ZALEN, Feb. 22, 2025: Lungleia Chapchar Kut 2025 lawmnaah Mizo Zaimi Inzawmkhawm (MZI) Hqrs., leh Music Domain Mizoram (MDM) Dist Hqrs., member zaithiamte an zai dawn lo. An member zai lui an awm chuan member nihna an hlihsak dawn.

He thu hi vawiin Lunglei Press Club-a thuthar thehdarhtute an kawmnaah pawl pahnih hruaitute chuan an puang.

Lungleia Chapchar Kut lawmna turah MZI leh MDM-te engmah hriattirna awm lova Organising Committee atanga paih a, an member zai tur ruat chungchangah pawh an hriatpuina tel miah lova ruat fel an nih hnu leh, engkim tihfel vek tawh hnua organizing committee-a ruat leh hnuhawh an ni chu an hriatthiam loh thu leh, pawl leh Lunglei zaimite palzutna lian taka an ngaih thu sawiin, kumin Chapchar Kut-a an member-te an zai dawn loh thu an sawi.

Chapchar Kut lawmna tihbuai an tumna a nih loh thu leh Lunglei zaimite thlavang hauh vanga hetiang thutlukna hi siam an nih thu an sawi a. Pawl pahnih member zinga Chapchar Kut-a zai luite chu pawl pahnihte hian an member nihna an hlihsak dawn bakah, member an ni thei tawh ngai dawn lo tih an sawi bawk.

Pawl pahnih hruaitute chuan zaithiamte hlawh chungchangah rate bituk thar a nih thu an sawi bawk a. An sawi danin, Lunglei khaw chhungah Rs 5,000 aia tlem lo leh, Lunglei khaw pawnah Rs 10,000 aia tlem loa rawih thin tur a ni.

Thuthar thehdarhtute an kawmnaah hian MZI Hqrs Lunglei President P. Lalhmangaihzuala leh MDM Dist Hqrs Lunglei President Joseph.VL. Muanpuia te bakah, pawl pahnih hruaitu eng emaw zat an tel.