Aizawl September 29, 2023 : Mizoram Governor Dr. Hari Babu Kambhampati ruahmanna angin India ‘Hnam Pa’ Mahatma Gandhi piancham denchhenin Governor Secretariat leh Commerce & Industries Department tangkawp chuan ni October 2-4, 2023 chhung hian Circular Lawn, Raj Bhawan-ah Mahatma Gandhi Piancham lawmnan leh hriat rengna atan 'The Grand Gandhi Jayanti Exhibition' a buatsaih dawn.

He exhibition hi Mizoram Governor hian October 2, 2023 zing dar 10:00 ah a hawng ang. Mizoram Governor chuan Exhibition tlawh tur hian mi zawng zawng a sawm a, exhibition tlawhtute’n tualchhung thilsiam an pho chhuah te hi lei theuh turin a ngen a ni.

He exhibition in a tum ber chu Mahatma Gandhi-a’n mahni tualchhung siam chhuah hmanga intodelh a, ramchhung thil siam  chhuah te a tam thei ang ber hman pawimawh a tihzia leh tualchhung siam chhuah thil chi hrang hrang uar chhunzawm zel a tulzia tih lanna tur a ni. He hunah hian tualchhung siam chhuah thil chi hrang hrang lei theih tura pho chhuah a ni dawn a ni.

He mi hunah hian Mizoram Rural Bank pawhin Central Sawrkar hnuaia Ministry leh Department hrang hrang te hnuaia hamthatna chi hrang hrang, kut hnathawktuten an hman tangkai theih tur te phochhuahna bakah bank dawr dan kalhmang inhrilhfiahna turin stall a hawng bawk ang.

He exhibition-ah hian Mizo siam chhuah handloom leh handicrafts thil chi hrang hrang lei tur a awm dawn bakah ei tur tuihnai chi hrang hrang lei theih turin Food court ruahman a ni bawk a ni. 

Exhibition chhung hian Raj Bhawan chu zing dar 10 :00 atanga tlai dar 7:00 thleng mipui tan tlawh theih a ni ang a, ni 4 October, 2023 tlai dar 4:30 ah cultural programme te nen Mizoram Governor in a khar ang.