March 12, 2024; DP&AR minister K. Sapdanga'n Mizoram sawrkar hnuaia thawk zingah, mahni post ni lo, hmun dang a thawk (attach) mi 4,000 an awm tih house a hrilh.

Assembly budget session neih mek nizan (11.3.24) a a department chante sawihona hmawr a bawkna ah he thu hi a sawi. A tarlan danin, department 27 ah mahni post ni lo hmun dang a thawk (attach) an awm a, school education department ah mahni post ni lo hmun dang a thawk an tam ber a, mi 1,776 an awm a, home department ah 1,282, P&E ah 286, PHE ah 227 an awm.

Group A zing ah mahni post ni lo hmun dang a thawk mi 115 an awm a, group B ah mi 347, group C ah 1,242, group D ah mi 193 an awm.

Hengte bakah hian cotract employee zingah mi 11 an awm bawk a, provisional employee (PE) ah mi 257, CSS hnuai a thawk mi 1,787 leh workcharge mi 49 an awm.

K. Sapdanga chuan, attach thenkhat hi chu hna tul vang, department hotute ruahmanna anga inhawh tawn an ni thei tih a sawi a, thenkhat erawh chu thawhna hmun a awm hreh vanga thuneitu sang ruai a, rem leh rem lo a attach an nih thu a sawi. "Heng zawng zawng aia tha lo chu officer thenkhatin an mimal hna thawk tur an hnuaia thawkte an chhawr thin hi a ni," a ti bawk.