Aizawl May 5, 2024 : Gazetted officer chauhin attestation/certification an tih theihna dan buaithlak tak thin chu awlsam zawka pumpelh a nih theih nan mahnia attest theih a ni tawh dawn.

Department of Personnel & Administrative Reforms (DP&AR) Commissioner & Secretary-in office memorandum a tihchhuaha tar lan a nih danin, 2nd Administrative Reforms Commission report l2-na thupui ‘Citizen Centric administration - The Heart of Governance’ chuan mipuite tan a awlsam zawk nan self certification tih theihna tur a duang chhuak a. He kalphungin a tum ber chu mipuite tan a remchan zawk nan hun leh pawisa leh tha khawhral a nih loh nan gazetted officer chauhin a attestation/certification an tih theihna dan buaithlak tak thin chu awlsam zawka pumpelh theih nan a ni.

Self certification-in a tum ber chu document photo copy-te gazetted officer chauhin an nemngheh theih thin chu tihtawpa chumi kalphung thlak nan chung document photocopy chu a neituin mahnia nemngheh theih nan mahnia attest theihna tur thuneihna a pe ang a, hei hian a tawp (final stage)-a original document an hmuh theih chauh a huam thung ang a. A tul hunah original document hmuhtir tur a awm loh chuan self-certified document hi pawm theih a ni lo vang.

Mizoram sawrkar chuan self certification chu kum khat 2024-2025 chhung enchhinna neiin he kalphungin a huam turin document pakua a thlang chhuak tawh a, document thenkhat, danin gazetted officer chauhin a nemnghet (certify) thei ang a tihho erawh a huam tel ve lo.

Self certified/self attest tura pawmte:

(i) Educational Certificate

(ii) Marksheet

(iii) Birth Certificate

(iv) ST/SC Certificate

(v) Residential Certificate

(vi) Electors Photo Identity Card (EPIC)

(vii) Family Ration Card

(viii) Employment Registration Card

(ix) Aadhar Card