A nupuiin awmna ngai atanga hmun hrang hrang thlir theih a duh miau si a, Bosnian pa pakhat chuan ama inzir chawpin in vir kual thei a sa hmiah mai.

“Ka nupui hian a sawisel fo va, sak that a ngaih thu a sawi reng a. ‘In vir thei ka sa ang a, i duh angin i duh lam lam i thlir thei ang,’ ka ti ta a ni” tiin kum 72 mi, Vojin Kusic chuan a in thar, mi tam takin an en sup sup hmaa ding chungin Reuters a hrilh.

Bosnia hmar lam, ram leilung tha tak, Srbac khaw bulah in hi sak a ni a, a tivirtu atan hian Kusic-a hian metre 7-a sei axis a siam a. An in bula vaimin chinna leh lo atanga kil danga ramngaw leh lui luangte pawh a thlir nghal theih vek a ni.

“A muang chia vir chhuak turin darkar 24 a duh a, a rang chi erawh chuan second 22 chhung lekin a ni thung,” a ti.

A nupui erawh chuan an in thar chungchang hi engmah a sawi ve duh lo.

Kusic-a hi in a sak dawn hian Serbian-American inventor pahnih, Nikola Tesla leh Mihajlo Pupin ten thil an lo tih tawhte a entawnin inzir nasain an fuih nasa hle a. Mi rethei chhungkua, zirna tha pawh dawng phak lo ni mah se, anni pawhin khawvel hriat an hlawh thei tih hriain a bei ta tih a sawi.

“He thil hi thil din mai piah lam, tumna leh hriatna ngai a ni a, hun leh hriatna neih ngah tawk a ngai bawk,” a ti a, a in thar chu amah vekin a sa zo tih a sawi.

In vir thei sak nan hian kum ruk hun a hmang a, hetih chhung hian a lung lam fel tawk lo avangin damdawi inte pawh a lut leh zauh zauh thin a ni.