International Beer Day hi kum tin August thla Zirtawpni hmasa bera hman thin a ni a, he ni hi tunah lar viau tawh mah se a intanna chu ho tê a ni a, United States-a California-a pa pakhat leh a thianten kum  2008-a bul an tan mai kha a ni.

A tirah chuan Aug. 5-ah an hmang thin a; mahse, kartawp chu remchang zawka hriatna a awm avangin kum 2013 atang khan tuna hman thin hunah hian sawn a ni ta a ni.

International Beer Day tichhuaktu hi Jesse Avshalomov-a leh a thian thenkhat, Santa Cruz, California-a mite an ni a. Avshalomov-a chuan a thiante nen hian an venga bar-ah he ni hi bul tanin bar dangah an pakai zel a. California chhim lamah chuan an beisei aiin a lar chak a, internet hmangin khawvel pumah hriat a hlawh zui ta a ni.

An official website-ah chuan he ni hi thian thate nena hlim taka beer tui tak inna ni, beer um thinte chawimawina hun leh he nia khawvel ram leh nunphung dang dangte beer hmanga suihkhawmna ni atan an ti tih an tar lang a ni.

Kuminah pawh Beer Day hi khawvel ram hrang hrangah hman a ni a, an tih tirha thian tha zualte tih mai mah ni se tunah chuan khawvel pumah hriat a hlawh tawh a ni.