Damlo enkawl hna la thawk reng doctor zinga khawvela upa ber, Guinness World Record-ah pawh a hming chuang tawh chu kum 100 mi ni tawh mah se chuti maia chawlh a la tum lo.

Ohio, United States doctor hian tun rum rumah chuan a hna chawlhsan a la rilruk rih lo tih a sawi.

Cleveland-a cheng, Dr. Howard Tucker-a hian doctor hna la thawk tak tak zinga upa ber nihna hi February, 2021 khan a chelh tan a, hetih lai hian kum 98 leh ni 231 mi a ni tawh.

Tunah chuan Tucker-a hi kum 100 a tling tawh a, a hna thawh mek chu full time-a thawh zui zel a la tum thu a sawi a, zing dar 9:00 atanga tlai dar 6:00 thleng a la duty dawn tihna a ni.

Doctor hian kum 100 a tlin hnu lawk, July thla khan COVID-19 a kai ve thu leh hetih lai pawh hian in atangin Zoom hmangin damlo a enkawlin mi hnenah zirtirna pawh a la pe zel tih a sawi.

“Guinness World Records-a hming lan hi ropui hle mah se chawimawina pakhat a ni ve mai a; rei tak, ka duh ang ngei leh hlim taka ka nun theihna hi ka tum lian zawk chu a ni,” tiin Tucker-a hian Guinness World Records hnenah a sawi.

Tucker-a te nupa hi mi danglam tak an ni ve hrim hrim mai a. A nupui, Sue-i pawh kum 89 mi zet ni tawhin psychoanalyst niin a la thawk reng a, ani pawhin an pa ang bawkin chawlh mai a la tum bik lo.

“Ka la tum teuh lo mai. Chawlh hi daih reina hmelma niin ka ngai a. Ka kum a la tlem lai pawh khan chawlh lam hi engtik lai mahin ka ngaihtuah ngai lo,” a ti. “I hna thawh chu i hmangaih zawng a nih chuan thawh zel theihna i la nei zel ang, engvangin nge chawlhsan i duh ang?” tiin a zawt.