British Columbia channel-a tui hleih pakhat chuan tui chhunga zungbun hlui tawh tak a chhar a, kum 17 zet liam tawha pa pakhatin a tihbo a lo ni.

Penticton police chuan Penticton Channel-a tual chhung mi pakhatin tui a hleuhnaa a chhar hi a neitu hmuh leh tumin a zawnna thu an chhuah a, zungbunah hian ‘Stephanie & Noel’ tih a inziak nghe nghe.

Police thuchhuah hi Noel Nissen-a puzawn chuan lo hmu fuhin a fanu leh a makpa tihbo ngei nia ngaiin a makpa hi a hrilh lehchhawng a ni.

“Ka puin min rawn hrilh a. News site pakhatah a hmuh thu sawiin, ‘I zungbun a ni thei mai lo maw?’ tiin min rawn zawt a ni,” tiin Nissen chuan CBC News hnenah a sawi.

Nissen-a hian kum 17 zet liam tawhah khan an inneih zungbun chu he channel-ah hian a lo tibo tawh ngei a ni.

“He zungbun hi kum tam liam tawha ka tihbo kha a ni a, chanchin ka han hria chu ka phu zawk a ni,” a ti.

Nissen chuan a tihbo tum hian a thian thenkhatte nen channel-ah hian kalin intihhlim nan tui an cheng a, a zungbun a bo tih hi a hre mai lo va, a car an thlen hnuah a hre chauh tih a sawi.

A zungbun an hmuh kir leh hun erawh a fuh hle a, a nupui, Stephanie nena an inneih kum 20-na an thlen dawn lai tak niin an thinlung a tithar hle niin a sawi.