Nebraska, United States-a pa pakhat chuan a kum 60 tlin lawmna chi khat atan mai lian tak, a lai ker kuak chu chuangin luiah mel 38 zeta thui a inkar.

Duane Hansen-a hian August 26 khan kum 60 a tling a, a mai lian tak, a lai a ker kuaka lawng atana a hman, ‘Berta’ tia a hming a vuahah chuangin Inrinni hmasa khan Bellevue-a Missouri River kam atangin a inkar tan a, darkar 11 zet a inkar hnuah mel 38 zeta hla, Nebraska City-ah a inkar kai a ni.

Bellevue khawpui thuneitute chuan Hansen-a hian luia a inkar hmain zingkarah pun khawmna tenau huaihawtin bul a tan tih an sawi a. Him taka thui tak a inkar avangin an lawmpui thu Facebook-ah an tar lang bawk.

Hansen-a hian a piancham lawmna atan hian Guinness World Record-a hming chuantir a tum a, mai lawnglenga inkar thui ber chu mel 25.5-a thui inkar, kum 2016-a North Dakota pa, Rick Swenson-a kha a ni.

“Duane-a’n world record a khum hi kan lawmpui tak zet,” tiin City of Bellevue chuan Facebook-ah an tar lang a. “Record siama Bellevue atanga mek 38 zet a inkar hi kan chhuak hle,” an ti.

Hansen-a’n hetianga thui mai lawnga a inkar hi record thara chhinchhiah turin Guinness World Records-ah thehluh a ni tawh.