Khawvela bodybuilder upa ber chu American Jim Arrington a ni a, tunah hian ‘putar tak tak’ a ni tawh a, heti chung hian a la intisek tlauh tlauh peih!

Guinness World Records chuan thil zawrh hna thawk thin (sales professional) Arrington-a hi kum 83 mi a nih lai, kum 2015 daih tawhah khan ‘khawvela bodybuilding upa ber’ tiin an puang tawh a. Tunah pawh a la intisek zel.

Tunah chuan kum 90 a ni tawh a, tu mai ni lovin tuchhawng pawh a nei tawh a, uluk taka exercise lain a la chak tha hle a, bodybuilding competition-ah pawh tha ber nihna la chelh theih a inring.

Inelnaa a tel hnuhnung ber chu Reno, Nevada-a IFBB Professional League niin mipa kum 70 chung lamah pathumna niin kum 80 chungah erawh pakhatna a ni.

Arrington-a hi tar ni tawh mah se a taksa a la nalh hle a, tun hnai lawkah pawh Men’s Health chanchinbuah pawh a thlalak la tar lan a ni.

Thla kim lo, a pian hun tur aia hma thla khat leh a chanvea piang niin kg 2.5 chauh a ni a, a dam chhuah theih nan an bei nasa hle tih a nu leh paten an sawi niin a sawi.

Thawhah a nei zui a, a naupan lai hian ‘a hrisel lovin a chak lo hle’ niin a insawi bawk.

Mahse, kum 1947, kum 15 a nih khan heng hi kalsanin thil rit chawi lamah a kal ta a. “Superhero nih ka duh thin a ni,” tiin hetih hun laia a rilru a sawi.

“Taksa mawi tak takte ka en thin a, anni chu lehpelh vek ka tum a, chu chu tunah chuan ka ti thei ta a ni,” a ti.

Arrington-a hian Guinness World Records-a a hming a chuang chu a tan ‘khawvel thar hawn ang’ a nih thu leh ti zel tura fuihtu a nih thu a sawi.

“Nuam ka ti a. Mi hnenah ka sawi fo va, hetiang hi ti thei erawh mi tlem te chauh an ni,” a ti.