Oregon, United State nu pakhat, Chicago atanga United Airlines thlawhnaa a thlawh haw kawnga a suitcase a tihbo chu kum li hnu zetah him takin a hmu kir leh a, a ip bo hi Central America laili thleng thlengin a lo zin kual hman.

April Gavin-i hian TikTok-a video chi hrang hrang a post-ah August, 2018-a hna thawka Chicago-a a kalnaa thlawhnaa a bungrua a hloh dan a tar lang.

Gavin-i chuan thla tam tak a zawng a, airline pawhin a bag hi mak takin a bo ringawt tih chauh an sawi thei tih a sawi a. A ipa thil a dah bo tate avang hian zangnadawmna pawh a hmu nual a, a vai erawh chuan a hmu bik lo tih a sawi.

Kar liam ta tir lamah khan Gavin-i hian phone call a dawng a, kum li liam tawha a suitcase tihbo chu Houston-a thlawhna tumhmunah a awm thu an hrilh ta mai a ni tih a sawi.

A suitcase hi Honduras atanga thlawk lut thlawhna atanga phurh luh daih a ni bawk si a ni.

“Honduras daih daih atangin! Tu nge he lai thleng thleng a kal tih hria ang?” tiin Gavin-i chuan video-ah hian a sawi a. “Mahse, Honduras atangin a lo thleng miau a, Houston, Texas-ah a lo thleng a, min lo bia a ni,” a ti.

Suitcase chu a lo hmelhem nual tih a sawi a; mahse, a chhunga mi a la kim vek tih a sawi.