Lithuanian pa pakhat chu a pum atangin doctor-ten perek, screw, nut leh chemte kilogram khat laia rit an zai chhuak niin an ram chanchinbute chuan an tar lang.

Doctor-ten an sawi dan chuan zu a nghei theih nan zu aiah thla khat vel chhung chu hetiang hian thir lam chi thil a hmawm thin.

Klaipeda University Hospital-a an zainaa a pum atanga an lak chhuah thenkhat chu  cm 10 (inches 4) vel laia sei pawh a awm niin Lithuania-a LRT public broadcaster chuan a sawi.

Surgeon Sarunas Dailidenas chuan an thil tawn chu ‘thil danglam leh vâng tak’ niin a sawi.

Lithuanian tawnga LRT-in KUH atanga thlalak tihchhuah an tar lanah chuan surgical tray-a thir lam chi hrang hrang an zai chhuah an dahkhawm an tilang a. Zai hi darkar thum chhung an ti niin an tar lang bawk.

Amah hi a pum a na vak a, hmanhmawh takin ambulance hmangin Baltic Sea vaukama damdawi in hi phurh thlen a ni.

An zai zawh hnuah hi chuan a dinhmun a tha niin KUH chuan a tar lang bawk.