Ayushmann Khurrana channa, Bala-ah khan a lukawlh thup ngat ngat hriat chhuahsak a nih ruala a nupuiin a hawsan kha a awm tawh a, hetiang deuh chiah hi Bihar-a Gaya district-ah Bajaura khuaah a thleng ve tlat mai.

Inneih lawmna hun hman laiin mo chhungten an makpa thar chu a lu a kawlh tih an hre chhuak a, an duh lo thar thut a, an um haw daih.

Social media-ah an makpa an tih dan vel hi a darh nasa hle a, tawngkaa an tih bakah kut pawh an thlak tih a lang.

Mo neitu hian inneih inkhawm laiin sam lem a lo vuah ngar ngar a, a hnuah an hre chhuak leh ta si a, mo chhungte an thinrim ta hle a ni.

Ngaihdam dil nasa hle mah se hmeichhe lam hian an khaw hotute hnenah an kalpui lui a, police inrawlh ngai lovin an ching fel.

An makpa thar hi a lu a lo kawlh bakah hian nupui a lo nei tawh a, then chuang lovin mi dang a nei leh tih an hre chhuak bawk niin Firstpost chanchinbu chuan a tar lang.

Tun hnai lawkah khan Karnataka-a inneihnaah pangpar inhlan lai (Hindu dana inneihna)-in mo neituin mo nghawnga a khawih chu duh lovin an inneih an thulh leh ringawt tawh bawk. 

Moodukonaje-a cheng nula leh Naravi-a cheng tlangval inneihnaah hian sakhaw dana pangpar an inhlan chu mipa hian a nupui tur nghawngah kher pangpar kual a bahtir a, mo thinrim chuan an inneihna hmun chu rang takin a chhuahsan ta daih a. Mo neitu pawhin inhmuhsitnaah ngaiin an inneih a thulh phah zui a ni.