Scotland-a khaw pakhat chu ‘Twinverclyde’ ti hialin an sawi thin a, karleh atanga sikul an luh tan leh turah pawh tum khata sikul kai thar tur phir ziak lut tam ber dawttu an ni leh dawn.

Inverclyde khua hian Zirtawpniah sikul an hawng leh tan dawn a, phir inkawp (set) 17 zet an inziak lut thar.

Kum 2015 khan tum khatah phir 19 zet hming ziah luh an lo nei tawh a, hei hi a tam ber a ni a, kumin hian a dawt ang.

Zirtawpni khan kum 2023-a sikul an kai tan tur pualin Greenock-a St Patrick’s Primary School-ah naupangte hian dress rehearsal an nei a. Phir 17 sikul kai thar tur zinga 15 an inlan.

Inverclyde-a primary sikul zinga St Patrick’s leh Ardgowan Primary School chu kumina phir kawl tam ber tur niin pathum ve ve an kawl dawn.

He khuaah hian kum 2013 atang khan phir 147 zet an awm tawh a, kum tin 13 awm ziah ang a ni.