Guinness World Records chuan record chhinchhiah thar an nei a, tun tum pawh a danglam leh khawp mai a, T-shirt feet 357.48-a sei, a hlai zawng feet 241.08 zet chu khawvela T-shirt lian ber tiin an chhinchhiah leh ta.

Record vawngtu pawl hian Asociatia 11even, Kaufland Romania leh Federatia Romana te tangkawpin he T-shirt lian uchuak tak mai hi an siam chhuah a nih thu an sawi a. Bungraw hman hnu chi hrang hrang sawngbawla hman nawn theiha an siam hmanga an siam a ni a, Romania-a cheng mi dangte thil hman nawn uar tura an zirtirna pakhat atana an tih a nih thu an sawi.

Nilainia an tichhuah tak T-shirt lian hi plastic bottle 5,00,000 zet sawngbawla an hman nawn hmanga an siam a ni a, a siam nan hian thla khat chuang zet hun an hmang a ni.

T-shirt lian ber siam huaihawttute chuan hlawh beisei lova thawk tura inpe mi 120 chuangin Bucharest khawpuia Arcul de Triumf National Rugby Stadium-a pawt pharh tur ringawt pawhin nilengin an bei tih an sawi.

A siamtute hian T-shirt an siam hi an chan dan leh ang a, mi pangngaiin an hak theih tur 12,000 chuang zetah chhuahin a mamawhtu naupangte hnenah an pe dawn tih an sawi bawk.