California, United States-a pa pakhat chuan kum 10 chuang chhungin khawvela ram awm zawng zawng a tlawh chhuak kim ta a, rei tak a nghah hnuah a hnuhnung ber, Turkmenistan chu kar hmasa khan a thleng.

San Diego-a cheng, Ramblin’ Randy tia an sawi mai thin, Randy Williams-a hian Asia khawmualpui lailia awm, Turkmenistan hi tlawh a tumna a rei tawh a; mahse, ram dang mite tana tlawh theih lohva kum li zet an inkhar avangin a nghak rei hle.

“Turkmenistan hi kan khawvela ram danglam ber pakhat a ni a, tlawh harsa ber pawh a ni ang,” tiin Williams hian KGTV hnenah a sawi a. “A luh theih dan awmchhun chu an pawm tour company kaltlang chauhvin a ni,” a ti.

Turkmenistan chauh hi Williams-a’n tlawh tuma rei tak a nghah a ni lo va, thla hmasa khan Syria a tlawh a, hei pawh hi a nghak rei a, a insawi dan chuan COVID-19 hripui a len hnua he ram tlawhtu pahnihna chauh a la ni.

Williams-a hian a tum angin United Nations-in ‘ram’ tia a chhal leh mahnia inrelbawlna hran nei, ‘observer state’ an tih, Vatican City leh Palestine nen ram 193 a tlawh chhuak ta vek a. Ram buai tak tak - Kosovo, Sahara khawthlang lam ram leh Taiwan thlengin a tlawh a ni.

Williams-a hi tunah chuan a hmabaka tih tur a ti leh nghal mek a. “Ram tin ka kal ta a, tunah chuan ka ramah ka awm a ngai ve ta a. People’s Republic of Slowjamistan-ah a ni,” a ti. “Ka ram a ni a, tuipui bulah acre 11-a zau ka lei a, Slowjamistan ka ti a. Ka ram a ni a, kei hi Salton ka ni,” a ti.