April 23, 2024; Mizo Academy of Letters (MAL) chuan vawiin khan kum 2023 chhunga lehkhabu ṭha ber atana an thlan, 'Pangparhnima' tih ziaktu Ahmangaihi Khiangte hnenah 'Book of the year 2023' an hlan.

BoY hlanna inkhawm ni paha MAL Diamond Jubilee lawmna inkhawm hi Chanmari YMA Hall-ah neih a ni a. Inkhawm hi MAL Ptesidentṭ, Prof. RL Thanmawia chuan a kaihruai a, khual lian Pu JH Zoremthanga, Chairman, MBSE chuan Book of the year lawmman hi a dawngtu hnenah a hlan a. Chawimawina hian thuziak chei (Citation) leh tangka fai Rs. 10000 a keng tel a ni.

Kum 2023 chhung khan MAL chhinchhiah dan chuan lehkhabu 170 a chhuak a. Heng zingah hian Ahmangaihi Khiangte ziak 'Pangparhnima' tih chu Book of the Year, 2023 atana thlan a ni. He lehkhabu hi thawnthu (fiction) a ni a, a thawnthu phuah dan leh a changtute a duan dan a danglam avang leh a ṭhat avangin BoY atan hian thlan a ni a, phek 500 chuanga chhah a ni. Youtube lamah ngaihthlak theihin a awm a ni.

MAL hi kum 1964 khan din a ni a, kumin hi a kum 60 na a ni a, kumin kum tawp lamah hian ropui takin jubilee hi lawm an tum a nih thu MAL General Secretary, Dr. Zoramdinthara chuan vawiina jubilee hawnna inkhawm leh Book of the Year lawmman hlanna inkhawmah a sawi.

Jubilee pual hian MAL leh MBSE ṭangkawp chuan chawhnu lamah seminar an buatsaih a. Chawhnu inkhawm hi Prof. Rualkhuma Colney, MAL Vice President chuan a kaihruai a. Hetah hian 'Tunlai Mizo Thu leh Hla Thlirna' tih chh Dr. H. Laldinmawia, Asst. General Secretary, MAL chuan a sawi a. 'Mizo ṭawng kalhmang: Linguistic lam aṭanga thlirna' tih chu Dr.BLaltleipuii, EC Member, MAL chuan a sawi thung a ni.