Aizawl April 25, 2024 : Vawiin khan Vector Borne Disease Control Programme, National Health Mission chuan DHME Auditorium, MINECO ah World Malaria Day an hmang a.Principal Secretary, Health & Family Welfare, Govt. of Mizoram Smt. Esther Lalruatkimi, IRS, chuan khuallian niin hun a hmanpui. Report atanga a lan danin Kumin 2024 Jan – Feb chhunga Malaria vei hmuhchhuah zat hi 1776 ni tawh in, nunna chan erawh an la awmlo.

Mizoramah Malaria a la hluar a, tun dinhmunah India ramah mi sang khat (1000) zel atanga malaria vei hmuhchhuah zat atanga chhutin Malaria tamna ber state nihna a hauh mek. Kum 2023 Jan – Dec chhunga Malaria natna vei hmuhchhuah chu mi 18005 niin, mi 13-in nunna an chan a. 2022 nena khaikhinin Malaria vei hmuhchhuah tam zawng hi za 76.02 (76.02%) laiin a pung a ni. Kumin 2024 Jan – Feb chhunga Malaria vei hmuhchhuah zat hi 1776 ni tawh in, nunna chan erawh an awmlo.

April ni 25 hi ‘World Malaria Day’ Khawvel pum huap Malaria Dona Ni’ a ni a. World Health Organisation (WHO) hnuaia World Health Assembly chuan kum 2007 khan Malaria (Sikserh) chungchanga inzirtirna leh hriat tur tul te inhrilh hriat thinna hun atan World Malaria Day hman a rel a. Tichuan, kum 2008 atang khan kum tin thupui neiin World Malaria Day hi April ni 25- a hman thin a lo ni ta a ni.