Aizawl May 26, 2024 : Mizoram Baptist Kohhran atangin Asia khawmualpui huap inrawnkhawmna leh inkhawmpui hmang turin Malaysia-ah mi thahnem tak an kal.

Asia Baptist Pacific Baptist Federation (ABPF) buatsaih rawngbawlna peng hrang hrang aiawhte inrawnkhawmna (Team of Consultation 2024) chu Pathianni atang hian Melaka, Malaysia-ah neih a ni a, heta tel tur hian General Secretary Rev. R. Lalbiakliana; AGS-Mission Rev. Dr. R. Lalthanmawia; Director, R&D Rev. L. Vanlalsanga leh Coordinator, R&D Lalrinawma te an kal ang.

Consultation hi Mission & Evangelism te, Relief & Aid leh Theology-ah te neih a ni dawn a, general secretary chu Consultation on Theology-ah telin, AGS Mission hi Mission Consultation-ah a tel ang a, R&D Director leh Coordinator te hi Consultation on Relief & Aid-ah an tel ang. Consultation hi Nilai thleng awh tur a ni.

Melaka veka Ningani atanga tan tur, Asia Pacific Baptist Youth (APBY) Conference vawi 18-na hman turah Mizoram atangin thalai pawl, Mizoram Baptist Thalai Kristian Pawl (MTKP) atangin mi 22 - MTKP hruaitute – Upa R. Lalrochama, President; K. Lalawmpuia, Asst. Secrtetary, Rbt H. Lalruatkima, Fin.Secretary leh Upa Pc Vanlalrova, Senior Adviser te bakah MTKP Executive Committee member atangin mi pariat leh TKP member 10 an kal dawn a. Hnahthial Pastor Bial pathum inzawmkhawm member 18-te chu BCM Zaipawl hmingin an kal dawn bawk a. MTKP team hi Thawhtanni hian an chhuak ang.

MTKP aiawha kalte hian chanvo hrang hrang hetiang hian an nei dawn a – Esther Sailo leh Zirsangpuii te chu workshop hran ve veah resource person niin, R. Lalthansangi chu worship team member-ah telin Jacob Khiangte, APBY Vice President ni lai mêk chu resource person pakhat niin ‘Youth Identity in Diaspora Community’ tih thupui hmangin workshop-ah hun a hmang bawk ang.

APBY Conference hi kum nga dana neih thin a ni a. Asia ram hrang hrang atangin palai leh chhimtu an kal khawm dawn a ni.