ZALEN May 02, 2026: M a l a y s i a sawrkar-in naupang kum 16 hnuai lam tan Social Media hman khapna dan thar a siam chu nimin khan hman tan a ni.

Malaysia Sorkar-a Communications and Multimedia Commission chuan naupang kum 16 hnuai lam tana Social Media hman khap tur hian hma a la a. Online Safety Act 2025 hnuaia kum bithliah ni thin kum 13 chu kum 16-ah tih san niin, he dan tharin a tum ber chu Social Media-a inbeihna, mi pawisawina, inbumna leh hur sualna kaihhnawih thil laka thalaite ven him a ni a. Social media hmang mektu naupang nuai 80 vel chuan kum bithliah finfiahna hi an paltlang a tul dawn a ni.

He khapna thupek kengkawh tur hian Social Media platform hrang hrangin hma an la dawn a. Sorkar inkaihhruaina thar hi an zawm lo emaw, dan bawh chhiatna emaw a thleng a nih chuan Social Media platform-te chu Malaysia pawisa Ringgit maktaduai 10 (US dollar maktaduai 2 chuang hu) thleng chawi tura hrem theih an ni dawn a ni. 

Malaysia hi Australia dawta Social Media hmang thei chin kum bithliah tisang hmasa ber an ni a, France, Spain, Italy, Denmark leh Greece bakah Indonesia leh Brazil pawhin kum bithliah tihhniamna tur hian hma an la mek a ni. 

Southeast Asia Meta Public Policy Director Clara Koh chuan, April thla khan Malaysia Sorkar hnenah kum 16 hnuailam tana Social meida hman khapna hi a hlawhchham thei tih an lo hriattir tawh thu a sawi a, kum naupang zawkte chu apps him bik atanga hnawt chhuakin, internet khawvel inthununna awm lohna hmunah a nawr lut zawk thei tih a sawi a. Meta chuan kum 18 hnuailam tan "teen accounts" an siam thar a, hei hian midang nen inbiak pawhna te, screen en theih hun bituk leh thil tha lo hrang htang a thunun thei dawn tih a sawi.