Mizo infiamna chanchina chhinchhiah tlak ni turin Lalrina Renthlei chuan Thawhalehni chhun khan Maldives Open 2024 - 10 Ball Pool Championship-ah khelin a inlan ta a, khelh khatnaah chak lo mah se beisei a la nei.

Lalrina hi a khelh hmasak berah hian khawvel huapa pool player tha ber zinga mi, World No. 1 pawh lo ni tawh leh European champion lo ni tawh, Alexander Kazakis a hmachhawn a. Greek pa lakah hian 0-8-in a tlawm a, a tla nghal lo thung.

Maldives Open 2024 hi double elimination hmanga khelh a nih avangin Lalrina hi tlang turin hun tha a la nei a, India sanaa Thawhlehni tlai dar 4:30 hian David Hayman, Czech Republic a hmachhawn leh nghal dawn a ni.

Lalrina hian an khelhna hmun, National Billiard Centre, G Youth Activity Centre, Miuzikee Hingun, Male, Maldives hi Thawhtanni khan a thleng a. Mizoram Snooker & Billiards Association (MSBA) president, Billiard & Snooker Federation of India vice president ni bawk, Vanlalnghaka'n a tawiawm a ni.

Maldives-a inkhel tur hian Lalrina bakah hian India atangin player dang pali - National 10 Ball Pool champion lai Shivam Arora, Maharashtra; National 10 Ball Pool quarterfinalist Kushal C, Karnataka; Chetan Chhapra, Hyderabad leh Laksh Sharma, Karnataka te an kal bawk.

Maldives Pool Billiards Association (MPBA) buatsaih Maldives Open 2024 hi Pathianni khelh tur a ni a. Khawvel huapa player langsar tak tak telna thin niin lawmman pawh $ 1,30,000 lai niin nikum khan Ko Ping Chung, Chinese Taipei chu a champion.

Kuminah pawh hian a tel an langsar hlawm hle a. Champion lai bakah hian World No. 1 ni lai, Fedor Gorst, USA leh tum thum world champion lo ni tawh, Thorsten Hohmann, Germany te pawh an tel.