Aizawl: Nimin khan Mizoram Journalists' Association, Mamit District, District Child Protection Unit leh District Legal Services Authority te tangkawp buatsaihin MJA Press Club Mamitah ‘Media Workshop on Child Abuse & Legal Awareness Campaign’ neih a ni a, he hunah hian MJA member bakah Mamit khawpui chhunga YMA leh Kohhran chanchinbu enkawltute an tel.   Media Workshop ah hian Mamit District Chief Judicial Magistrate Gracy L. Bawitlung leh Dr. R.Lalrinhlua District Child Protection Officer ten kalkhawmte hnenah dan hrang hrang leh a hman dan te, chanchinbu mite tana tih tur chin leh tih loh tur te bakah, naupang kum tlinglo chunga hleilenna thleng thin chungchangah te, nau lak (adoption) chungchangah te zirtirna an pe a. Vantlanga thil thleng langsar a awm chungchanga chanchinbu miten an tarchhuah tur chin leh an himna turte zirtirna an pe bawk.   Media Workshop hi chawhma hun hi PC. Lalthanzuala, Vice President, MJA Mamit District in kaihruaiin, chawhnu ah C. Lalramdinzela, President MJA Mamit District chuan a kaihruai a ni.