Aizawl: Mamit District Liquor Prohibition Coordination Committe chuan Zirtawpni khan an chairman Mamit SP Shashank Jaiswal kaihhruainain krismas leh kumthar vuak veta joint operation neihte a office chamber-ah thlirletna hun an hmang a. Police hotute bakah Excise & Narcotics hotute, Mamit Sub Hqrs YMA leh Mamit khawchhunga branch YMA hruaitute an tel. Committee hi ni 21.12.2018 khan din niin hemi ni atang hian joint operation hi tum 6 neih a ni tawh a. Rakzu fun 85, zu bilh lai litre 300, IMFL um chanve 54, IMFL um puitling 1, cane beer 9, ganja pack te 3, damdawi mum 10 man niin, Rakzu factory hmun 3-ah tihchhiat a ni bawk a ni. Heng kaihhnawihah hian mihring 3 man an ni a. MV act bawhchhia mi 61 man niin Rs. 32400 chawitir an ni. Mamit District chhungah Krismas leh kum thar vuak vetah hian lirthei chesual emaw chhiatna lian tham a thleng lo nia hriat a ni a. Kumhlui thlah zanah pawh halpuah/halmawi hal thawm hriat tur a awm meuh lo a ni. Chairman Shahshank Jaiswal chuan boruak muanawm leh thlamuanthlak tak hnuaia hunpui an hmang thei chu duty te thawhrah a nih thu sawiin lawmawm a tih thu a sawi. Committee chuan duty-ten a tula anga hman atana agency pathum Excise & Narcotics, Mizoram Police leh Joint YMA te hnena Rs.5000 theuh petu Mamit bialtu MLA Er. H.Lalzirliana chungah lawmthu a sawi bawk. Meeting zawhah hian tun hnaia man IMFL um chanve um 47 leh Rakzu fun 7 te chu tihchhiat nghal a ni. Committee chuan he district hi a lo ralmuana mipuite thlamuang taka an awm theih nan a tul anga hmalak zel nise an ti bawk.