Manchester City leh Harry Kane chu hun engemaw kal ta atang khan sawi zawm ni tawhin City lam hian Spurs hmatawng hi an duh zia an lantir tawh a, Harry Kane-a pawhin City lama kal hi a hnial lo tih chu a hriat tawh. Chutih rualin, Tottenham lam chuan an English forward hi chhuah mai an tum rih lo hle a, City lam duhna hi an pawh tha duh vak rih lo.

Hemi chungchangah hian Manchester City boss Pep Guardiola chuan, “Spurs lam hian inbiakna kalpui an duh lo a nih chuan Kane-a lak luh tuma kan beihna hi  chu kan chawlh san tawh rih ang,” tiin a sawi. 

City-in Aston Villa atanga midfielder Jack Grealish an lakluh tuma Press conference-ah Guardiola chuan Spurs lamin an player chungchanga inbiakna chu kalpui an duh chuan inbiak an hnial loh thu a sawi a, mahse thu an pawh duh lo a nih erawh chuan inbiak zawm tuma hma an lak loh tur thu a sawi chhuak a ni. 

“Club dang pawhina an duh em em striker hi chu, Jack Grealish-a kan dawr dan nen chuan a thuhmun thei lo. Tin, Jack kha chu release clause neisa a ni a, Kane erawh a ni ve lo,” tiin Pep chuan a ngaihdan a sawi.