Man City-in Sergio Aguero thlaktu tur an la dawn em?

Admin - Apr 04, 2021

Erling Haaland (Dortmund), Harry Kane (Tottenham), Romelu Lukaku (Inter Milan) Paulo Dybala (Juventus) Jack Grealish (Aston Villa) Michael Olise (Reading) Lionel Messi (FC Barcelona) Wesley (Palmeiras)

Tun season tawpah Sergio Aguero chuan Manchester City a chhuahsan tawh dawn a. Kum 10 chuang zet striker rinrawl bera an hman aiawh tur lak chungchangah hian sawi a tam hle. Player langsar tak tak nena sawizawm an nih mek laiin an manager Pep Guardiola erawh chuan tun nipui transfer lo thlengturah hian an stricker Sergio Aguero thlakna tur midang an lak rih loh maitheih thu a sawi chhuak. 

Striker an mamawh lo nge, a rukin an zawng?

Tun season zawh ruala a contract zo tur Aguero, 32, chuan Thawhtanni khan City a chhuahsan tur thu a tichiang tawh. Aguero thlakna tur an lak loh maitheih thu Pep chuan sawi mahse, Aguero bak Gabriel Jesus chiah striker an nei. Hei vang hian Champions League trophy beisei City hian mithar an mamawh tih a chiang. City boss Guardiola pawh a awm mai mai lova, mi thar melhin a buk kual vel mek a nih hmel. 

Chung zingah chuan Borussia Dortmund striker Erling Braut Haaland, 20, chu a mizawn zinga tlar hma luahtu nia hriat a ni.

Hetihrual hian, Haaland-a man an chhiar zat chu sang a tih thu sawiin, “Hma hunah engnge thleng dawn tihchu ka hre hauhlo naa, a man an chhiar zat ang hi chuan striker tumah kan lei thei lovang,” a ti.  “Tunlai hian club zawng zawngin sum lamah harsatna kan hmachhawn vek. Hetianga man to hi chu kan lei phak a ni lo,” a ti. 

Dortmund chhuahsan hrehlotu Norway international Haaland hi euro maktaduai 150 an chhiar a. Club lian ho ngaihven a hlawh hle nghe nghe. A transfer chungchangah hian a agent Mino Raiola chuan Barcelona leh Real Madrid lam pawh a dawr tawh a ni.

Haaland-a contract hi 2024 thleng ani a, mahsela, nakum atangin a release clause hi euro maktaduai 75-ah a tlak thlak dawn avangin, hralh to theih laia hralh mai chu an pawitilo a nih hmel.  

City striker lak hual zingah England captain Harry Kane pawh  tlar hma luahtu a ni. Ani pawh hian 2024 thleng  Tottenham lamah contract a la neih vangin a man a hniam theiin a rinawm loh. 

Aguero hmun ruak chu

Kum 2011 khan Atletico Madrid atangin Aguero hi an lalut a, City tan goal thun lamah record siamin game 384-ah goal 257 a thun thei a ni. 

2012-a hun tawp dawn injury-time a chakna goal QPR laka a thun khan a tihming thang zual a, kha goal avang khan kum 44 chhung trophy chawi tawh lo, City chu a champion pui a, chumi hnuah City chu tum 3 Premier League title leh FA Cup 1 bakah League Cup 5 zet a chawi pui thei.

Hetianga record a neih that avang hian Guardiola chuan,"Aguero a hlawh tlinna ropui tak khum tur leh, a hmunruak luah tur player lak tum chu thil theih a nilo,” a ti thlawt. 
Messi laka beidawng City in minaran lei an tumlo

Club hausa City hian season hmasa atang tawh khan Barca superstar Lionel Messi lakluh tumin an hel tawh a, mahse, an beisei angin thil a kal lo. Messi lak luh tum kawngah an beisei a tawp titih a, midang an melh leh tan. Mahse, player naran erawh lak an tumin a rinawm loh. 

Tun nipui bazar-a an che chhuak a nih chuan, Erling Haaland emaw Harry Kane te chu an lak tum zinga hming langsar an ni. Mahse, anni pahnih hi an man a to tham deuh avangin City coach chuan lakluh an harsat a rin thu a sawi.

Pep-a mit fukna player te 
Khawvel coach tha ber pawl hian a team mamawh chu a haiin a rinawm loh.  Player kan mamawh belh lo tireng chung siin a mit erawh a len vel ruai a. Nipui transfer-ah hian in bazar  rum rum lo mah se, season thar tur thlir chuan player a lei ve ngei chu a ngaih hmel. 

Guardiola’n a team thuam chak natur a player duh te chu: Erling Haaland (Dortmund), Harry Kane (Tottenham), Romelu Lukaku (Inter Milan) Paulo Dybala (Juventus) Jack Grealish (Aston Villa) Michael Olise (Reading) Lionel Messi (FC Barcelona) Wesley (Palmeiras) te an ni. 

Share now