Cristiano Ronaldo chuan a khelh mekna Man United chhuahsanin Champions League khel tur club dang a melh a, a tir chuan United lam hian an remti lo dawn dawn a, mahse hun eng emaw chen atang khan chhuak mah se pawi an ti lo a, mahse tunah erawh nipui transfer a tawp tak avangin, a tui emaw tui lo emaw United tan a inkhelh rih phawt a ngai dawn a ni.   

2021-22 season khan Manchester United an chetha lo hle a, Premier League-ah parukna niin Champions League khel turin an tling phak lo. Mimal tak chuan Ronaldo hi a chechhe lutuk hran lo va, United chhungkaw bikah chuan top scorer niin 'Sir Matt Busby Player of the Year' a dawng phak hial a ni. 

Kum 37 mi leh a agent te chuan, club dang melh kual nual mah se an club dawr thenkhat chuan hlawh tam Manchester United superstar kawl hi an chak vak lo a nih hmel. Club 5 Ronaldo hnawl tute chu:

 Borussia Dortmund
Borussia Dortmund hi Ronaldo hnawltu club hnuhnung ber an ni hial awm e. German chhuak Bild chanchinbu chuan, kum 37 mi hi Bundesliga lam han thlen san pui viau tur leh club lam pawhin han thatpui hluai tur player-ah an ngaih chiah tawh loh thu an sawi a, chuvangin an indawrna pawh an ngaihven zui ta lo.

Ronaldo-a agent Jorge Mendes chuan, Dortmund lamah hian a nau hi a zuar nasa viau tak naa, beisei loh takin an lo hnawl mauh mai. Player naupang zawk lei a, chher chhuak thintu Dortmund lam hian ballon d'Or dawng tawh Ronaldo khelh dan an enin an it tehchiam lo a nih hmel. 

Atletico Madrid
Jorge Mendes bawk hian nipui transfer tan tirh khan Ronaldo hi Atletico Madrid lamah a zuar a, mahse an lo hnawl. MARCA sawi danin Atletico lam hian an hmelma hlun Real Madrid star hlui a nih vanga hnawl ni lovin an sum pai dinhmunin a zir loh vang zawka hnawl an ni awm e.  

Atletico Madrid president Enrique Cerezo erawh chuan Manchester United superstar chungchangah indawrna a awm loh thu a sawi thung a. El Partidazo de COPE radio a hrilh danin,"Atletico Madrid lamah Cristiano Ronaldo a rawn kal dawn tih thu hi khawi lam atanga rawn irh chhuak nge a nih ka hre lo, dawt thuthang mai a ni. A tan Atletico Madrid-a rawn kal hi thil theih a ni lo," a ti hmak thung. 

Paris Saint-Germain
    Fans lam chuan Ronaldo leh Lionel Messi te pahnih an career chhunga vawi khat tal team khata an khel duh chu hmuh an chak ngeiin a rinawm. Tun transfer tantirh lam khan a agent Mendes chuan Manchester United no. 7 hi Paris Saint-Germain a zawrh niin ESPN chuan an sawi. 

Mahse, Ligue 1 champion lam hian an lo uksak vak lem lo a nih hmel. Pawisa ngah ngawt mah se Lionel Messi, Kylian Mbappe leh Neymar te an kawl mek a, an mamawh em em rih lo pawh a ni ang. Bakah heng player pathum te hian an hlawh tam em em a, chuvangin hlawh tam tak tur player han lakluh leh kha chu an tan a ngam awm rih loh a nih a rinawm.   

PSG-te hi an sum lakluh leh hman chhuah a inmil loh vangin pawisa chawitir tura tih an ni mek bawk. 

Bayern Munich
Bayern Munich hian an club-a Ronaldo lut tur anga sawi thawm awm chu chiang takin an hnawl fithla a, Mendes-a'n Manchester United star a zawrhna hi an ngam lo a ni ber. 

Bayern Munich, Board of Directors, President, Oliver Kahn-a'n MARCA chanchinbu palai a hrilh danin,"Cristiano Ronaldo chungchang hi uluk takin kan sawi ho ngei a, kei phei chuan khawvel footballer piang tawh zinga player ropui ber pakhat a nih thu hi ka pawm thlap. Mahse, tuna kan club philosophy kal pui anga khel ve tur chuan a fit tawk lovah kan ngai," tiin a sawi. 

Chelsea
The Athletic sawi danin, Ronaldo khan tun nipui transfer chhung ngei a Chelsea zawm a tum ruh hle a, Chelsea neitu thar Ted Boehly leh Mendes pawh transfer chungchang sawiin an inhmu zak zak tawh a ni.  

Mahse, coach Thomas Tuchel-a'n Blues team din a tum danah Ronaldo hian hmun pawimawh a luah phak dawn tlat lo a nih hmel. Fabrizio Romano meuh pawhin a tuipui hman viau a, mahse Tuchel-a tan Stamford Bridge lam Manchester United forward lakluh chu thil ropui tak a nih a rin loh thu a sawi chhuak a, a hnu lawkah a inbiakna chu a hlawh chham zui ta a ni.