ZALEN July 15, 2026 : India hmar chhaka Mahindra Automotive dealer inhmuh khawmnaah Mana Motors an langsar a, financial year 2025-2026 chhunga an chet that avangin award paruk an dawng.

July 9 khan Kaziranga, Assam-ah India hmar chhaka Mahindra lirthei zuartu dealer 19 an inhmu khawm a, April 2025 atanga March 2026 chhunga kawng hrang hranga tithate hnenah chawimawina an sem chhuak.

Personal (Passenger) Vehicle huang atangin Mana Motors hnenah lawmman chi hrang paruk : Excellence Award, Digital Performance, Customer Satisfaction, Shield Performance, Thar Brand Award leh Test Drive Titan Award hlan a ni.

General Manager Ramnghahmawia Ralte (Angtea) chuan sumdawn nana hman chi (commercial vehicle)-ah hriat an hlawh zawk thin tih a sawi a, tunhnaiah mi mal hman chi (passenger car) hralh chhuahah hma an sawn a, tan an lak mekna PV huangah hian award paruk ngawt an dawn theih avangin an lawm hle tih a sawi.

2025-26 chhungin Mana Motors hian lirthei 2,107 hralhin kum hmasa aiin 20%-in hma an sawn a, heng zinga 921 hi mi mal hman chi niin hemi huang bikah hian 32%-in hma an sawn. Chutih rualin, hmar chhak dealer zingah hralh hnem ber an ni lo a, an hnathawh danin hotute mit a tlung ve thung.

Anmahni dawrtute leh an car zawrh khalh chhin duhtute an dawnsawn dan bakah guarantee (shield) an kalpui danah dealer dang aiin an che tha a, Thar car bik an sawngbawl dan kawngah India hmar chhaka titha ber an ni tel bawk.

Mizorama Mahindra full range dealer Mana Motors hian sumdawn nana hman chi lirthei - Pikup leh a dangte an hralh that viau laiin mi mal hman chi an hralh chhuahin a tluk lo deuh thin a. Mahse, kum kal ta atangin thla tin PV 100 dawn hralh ziah ang an ni chho tawh a, hma lam panin ke an pen mek tih an sawi.

Angtea chuan Mahindra car chhuanvawr zinga mi Thar an hralh chhe lo tih a sawi a, tlangzarh a nih atangin lei duhtute an la pe hneh lo va, tun thlengin hauh lawk 50 vel la awmin Mizote hriat lar Bolero hauh lawk 100 vel an la awm bawk, a ti.

Sorkarin India rama lirthei hralh zawng zawng an chhinchhiahna Vahan-ah Mana Motors hian May khan lirthei 281 an ziak lut a, a vawi khat nan Mizorama lirthei ke li nei zuar zingah thla khat chhunga ziak lut hnem ber an ni. Mahse, June khan an duh zat lirthei an dawng thei lo tih sawiin an tla hniam a, 189 an ziak lut.

Thla kal mekah a chanve ral tawhin, July 15 thlengin 111 an ziak lut a, Mizorama lirthei ke li nei zuar zingah tun thla chhunga hralh tam ber niin hma an hruai mek a ni.