Aizawl April 25, 2024 : Mizo Students’ Union (MSU) General Headquarters, Aizawl chuan NIT Director Prof. S. Sundar hmuin Manipur buaina avanga Manipur-a zirna chhunzawm thei lo Zohnahthlak NIT zirlai chungchangah Mizoram NIT-a an zir chhunzawm theih dan tur an sawipui.

MSU chuan Kuki Student’s Organisation te’n Manipur NIT zirlai 38-te tana tanpui an ngenna kal zelah NIT Director leh Registrar te hnenah Mizoram NIT-a zirna an chhunzawm theih dan tur ruahmansak turin an thlen a. Heng zirlaite hian Manipur buaina avangin class an kal chhunzawm thei tawh lova, semester hnih lai an thulh phah tawh thu MSU chuan NIT thuneitute hnenah an thlen a.

NIT Mizoram Director chuan, "Manipur state buaina avanga zirlaite’n an tuar chu tha lo a tiin zirna chawlh phah khawpa inbeihna thleng chu fel lo a tih thu MSU hruaitute a lo hrilh a. Zirlaite pawhin zirna an chhunzawm ngei theihna turin Ministry of Education leh NIT Manipur Director hnenah a thlen tur thu sawiin, tun dinhmunah exam buatsaih mai tur a nih tawh avangin semester tan leh hma August ni 1, 2024 hma chuan zirlaite dinhmun tur pawh hriat theih a beisei thu MSU hruaitute chu a lo hrilh a. Zirlaite pawh eng tik lai pawhin class an chhim a phal reng," a ti.

MSU chuan Manipur state buaina avanga Zofa zirlai harsatna tawkte tan MSU Pisa a inhawng reng a, zirlai nu leh pate pawh inthlahrung lova harsatna an tawh te thlen zel turin an ti bawk.