- F. Vanlalpeka

Manipur Phaizawla cheng, Meitei hnam te nen hian Tlangrama cheng, (Naga Hnam hrang hrang tih loh) a bikin, keini Mizo Hnam hrang hrang chengte hi heti taka Meitei hnam nena kan han buai em em ta mai hi kum 1986 chho atang tawha thil thleng thei tih kan hlauh ruk tawh kha a ni. 

Manipur Tlangram hmun, Naga hnam peng hrang hrang chen lohna hmun zawng te, entirnan, Tui-thaphai  area (Churachandpur Area) phei chu Mizoram chhunga chengte nena engkima inthlunzawm vek a  ni. Kohhran lamah ni se, Mizoram Synod enkawlna hmun ni reng thin a ni a. Mizoram Kohhran hrang hrang thlunzawmna hmun a ni bawk. Mizoram Central YMA hnuaia Group YMA hmunpui a ni bawk a.  Mizoram Mizo Zirlai Pawl Sub. Headauarters hmunpui a ni bawk. Hei bakah, Mizo Hnam Inpumkhatna (Mizo National Integration) tura ding zui ta, Manipur Mizo People Convention hial dinna hmun a ni.

Manipur Phaizawl,  Imphal khawpuia cheng, Meitei-ho nen hian innghirngho a ni ngai lo. 

A chhan chu Mizo hnam, Mizo hnahthlak te hi  inpumkhat tlat angin min hmu a. Mizoram chhunga Mizo Hnam (Mizo National Umbrella) dik tak, Indian Union hnuaia kan inziah luh tawhna heng, Ralte, Hmar, Fanai, Paihte, Thahdo, Vaiphei, Pachuau, Chhakchhuak, Hnamte ........etc. te hi kawikawm thin anga rual taka tangrual thei vek kan nih vangin, Meitei hnam cho rual loh kan ni.

Hetianga Mizo Hnam ten Manipur tlangram hi kan Pi pu te atanga kan luah nghehna hmun a nih avang hian,  Meitei-ho hian fing takin, thendarh la, awpbet rawh, tiin,  Hnam bil (Tribes) hming ang zela an ruahman rukna kal zelah,  Manipur Tribes Recognition hmanga dah chhoh a ni a.

Manipur Tuithaphai Area-ah hian  heng Paihte, Thahdo, Hmar, Vaiphei, Rangte etc.... te hian mahni Hnam bilin Organisations an kalpui ve ta mai a.

Rangte @Gangte hnam erawh chu rawn kir lehin, vawiin ni thleng hian Mizo Organisation-ah an  awm. 

Manipur Tlangrama cheng te hi Mizo Organisation ni ta si lo te !  Hnam bil zawng zawng tih mai tur chuan,  mahni theuh inngaihtuah a lo ni zui ta a.

Manipur tlangrama cheng hlawm lian tak, Naga Hnam te erawh chu Naga Blood & Organisation @ UNC : United Naga Council hian vawiin ni thlengin a la kengkawh bik ta zel a.

Manipur Mizo tiin emaw, Mizo National Blood & Organisation Umbrella, tiin emaw vawiin niah hian han inchhunglut thei hlawm sela, a va'n ropui dawn em !  Manipur tlangrama Rangte @ Gangte hnam ten Mizo Blood & Organisation  Umbrella an rawn luhchilh leh ang hian.

Tunhma Assam Bawrhsap (British rorelna) hnuaiah khan, Lusei hnam tawng hi lal rorelna tawng hman a nih avangin, (tuna Mizoram hming lo ni ta hi) he tlangram pawh hi Lushai Hills tih a ni. 

Hetiang deuh hian, Manipur tlangram hming hi Assam Bawrhsap (British rorelna) chuan, Manipur Tlangram  hi Kuki hmingin a recognized ve a. Chuvangin, Manipur Kuki hming hi Hnam hming ni lovin, Hills Area hming a ni. Mizo Hnahthlak Thahdo hnam bik  ten chenna hmun nghet (Homeland) atana senghawi chhovin, an keng zui ta a ni. 

Tichuan Manipur tlangram thenkhat chu Kuki Area a lo ni a, Tui-thaphai leh a chhehvel ( Churachandpur District) zawng zawng pawh chu Mizo National Blood Umbrella chauh ni ta lovin, tunhnaiah phei chuan Zomi hming an lo vuah leh der tawh ! Zomi hming hi lo pawm ta ila,  hming dang a piang leh thovin a rinawm. Khawvelah hian Hnam kan nihna hrula hming dang kan phuah kan phuah chuan kan inthendarhna a thlen thei.

Chutichuan,  Manipur tlangrama cheng Mizo Hnahthlak kan lo tih te chu  Zo Hnahthlak tiin kan koh zui a, Zomi ti te leh Kuki tiin kan inkoh ta hlawm a !
Inlungrual nan kan hmang em le ?

"Insuihkhawm leh zai i rel ang u" tih thu hi Intawhkhawmna Hla chauhva sa dual dual tawh lo hian, Intawhkhawmna Hla chauh a ni lova, Meitei hnam do hona atan leka hmang lova, a tak ram thlen nana hman chi a ni tawh e.

Mizo Hnam hming (Mizo National Identity) hi kan  pianchhuahna leh  kan thihpuina Hnam hming atana kan hman hun hunah, Hnam anga dinchhuah nan leh thenawm doral hma-a zam lova Ral kan hnehna tur Hnam hming a ni e.

Mizo Hnam hi Mizo Hnahthlak/Zo Hnahtlak Inpui ni se, Mizo Tawng hi kan zavaia intawm Tawng a ni. Kan pianpui tawng hman erawh a bo dawn tihna a ni lo. Greater Mizoram- ah hian lungrual ila, Mizo Hnam Inpui  Aizawl khawpuiah lungrual bawk ila, Hnam angin kan tangrual thei ngei ang.