Manipur Governor Anusuiya Uikey chuan Zirtawpni khan hmarchhak state-a tharum thawhna a thlen thar leh chhan, thalai pahnih ruk bo an nih hnua thah tak nia sawi chhungte a tlawh.

Governor hian zirlai pahnih chhungte hi Imphal West district-a an chenna in ve ve-ah a hmu tih Raj Bhavan thuchhuah chuan a tar lang.

Zirlai pahnihte hi July thla khan an chin hriat loh an ni a, Thawhtanni khan an ruang thlalak chu social media-ah a darh thar chiam a, a tukah state khawpui, Imphal-ah buaina a chhuah leh phah nasa hle.

“Larsap hian zirlai pahnih chhungte hnemin pakhat zawk nu, ni eng emaw zat chaw lo nghei tawh pawh tui a pe,” tiin Raj Bhavan chuan a tar lang.

Uikey-i hian an chunga pawikhawihtute chu dan anga hrem an nih ngei tur thu a sawi.

Uikey-i hnenah hian Thawhlehnia zirlai pungkhawmte lakah venhim hna thawktute an che na hle tih tual chhung miten an lo hrilh bawk tih Raj Bhavan hian a tar lang bawk.

Thla nga dawn chi leh chi inkara buaina chhuah tawhna state-a zirlai hmeichhia leh mipa thihna hi CBI team-in an chhui mek.

State sorkar chuan Ningani khan tun hnai ni hnih chhunga lungawi lohna lantirtu, a tam zawk zirlaite laka venhim hna thawktute chet dan na lutuk nia sawi awm chhui chiangtu tur committee a din tawh.

Thuthar lakhawmtute a kawmnaah Uikey-i chuan nu leh pate chu an faten lungawi lohna an lantir pawhih a muanawm zawnga che tura ti turin a ngen a, dan chu anmahni thua lekkawh mai lo turin zirlaite a ngen bawk a. Tun hnaia an chetnaa hliam an tawrhte pawh nakin zel thlenga anmahnia nghawng nei thei a nih thu a sawi bawk.

Zirtawpni vek chawhnuah khan governor hian zirlai hliam tuar leh an nu leh pate chu Shija Hospital, Langol-ah a tlawh bawk a. Kanna sum fai a hlan hlawm.

Larsap hian rang taka dam chhuak tur leh damdawi an mamawh ang pawh ngaihtuahsak zel a tiam.