Manipur atanga sipai tang, chawlh hmanga haw, an in atanga ruk bo chu a ruang chhar zui a ni.

Sepoy Serto Thangthang Kom-a hi Imphal West district-a an ina chawlh hmanga a haw chu Inrinni khan hruai chhuah a ni a, Pathianni tukah khan a ruang chhar zui a ni ta a ni.

An in atanga hruai chhuaktute hi tute nge an nih hriat an ni lo va, mipa, ralthuam keng niin chawhma dar 10:00 velah hruai chhuah a ni.

A fapa kum 10 mi chuan an pafaa an sumhmuna an lo awm laiin mipa pathum an lo kal tih a sawi a, ani chiah hi an hruai chhuak lai hmutu a ni nghe nghe.

A pa lu-ah pistol-in an tin a, lirthei varah lut turin an nawr lui ta niin a fapa hian police hnenah a sawi.

A ruang hi Imphal East-a Mongjam khawchhak lam, Khuningthek khuaah hmuh a ni a. A unaupa leh a nuphalin amah ngei a ni tih an finfiah tawh a, a lu-ah silaia kahna hnuhma a awm niin an sawi bawk.

Sepoy Kom-a hian a nupui, a fanu leh fapa a kalsan.

“Sep Serto Thangthang Kom-a thahna hi kan dem tak zet a, an hun hrehawm takah hian a chhungte pawh kan tawrhpui tak zet a ni,” tiin Army-in thuchhuah an siam.

A thlahna hun hnuhnung pawh a chhungte duh angin kalpui a ni dawn a, Army chuan a tul anga a chhungte tawiawm turin an mite an tir nghal tih an sawi bawk.