2nd July, 2023: Manipura tharum thawhna thar thleng vuak vetah MPCC chuan vawiin khan thuchhuah siamin Manipura Zohnahthlak te an rum takmeuh laiin Mizoram kan Chief Minister Pu Zoramthanga chu hmalak ngaihna hre lovah leh Zohnahthlak unaute himna leh damkhawchhuahna lam pawh ngaihtuah lovin Campaign buaiin a buai niin an puh.

Thuchhuah-ah chuan "Amah pawh be duh lo tu, Manipur Chief Minister Biren Singh-a'n Zohnahthlak te chunga rawng taka chet hnuah phone hmanga bia in chu chu a hmalakna neihchhun a ni. Pu Zoramthanga Chief Minister na hnuaiah hian Mizoram leh Zohnahthlakte dinhmun a him lo takzetah Congress Party chuan a ngai a ni." tiin an tarlang.

Home Minister Amit Shah leh PM Narendra Modi te'n Manipur buaina an ngaihsak loh zia chu tlang hriat a ni nih thu ziakin, "Hetiang a nih lai mekin vawiin ni 2.7.2023 (Pathianni) Christian te ni serh Pathianniah ngei Langza khuaah Meitei ho lutin chenna in bakah Pathian Biak In nen lam an hal fai vek a. Kan unaute chhanhim tuma beitu David Thiek chu Meitei hovin rawng taka thatin a lu tan sakin khaw daiah rapthlak taka an tar thu media lamah tarlan a ni a."

"Kan unate thlavang an hauh thei lo a nih chuan BJP nena an thawhhona pawh chhu chat turin kan ngiat a ni" an ti bawk. Manipur buaina chuan thla hnih chuang a awh hnuah mi 100 chuang zetin nunna an chan tawh a, Biak In leh chenna in sang chuang hal chhiat ani a, mi 50,000 chuang relief camp 1,000 chuangah an awm mek niin an tarlang bawk.