ZALEN, September 21, 2025: Mizote zinga chanchinbu leh social media-a ram veina thu ziak tam ber pawl, M. Lalmanzuala (IAS retd) lehkhabu, ‘Nghet Taka Ding Zelin’ tih chu ennawna tilian (revised & enlarged)-in Inrinni khan tlangzarh a ni.

Rs. 600 man lehkhabu hi Hotel Tavern, Chaltlang, Aizawla tlangzarh inkhawm hi Miss Mizoram 2020 Zirsangpuii’n a kaihruai a, Vanlalngaia’n a tlangzarh a. Malsawmsanga, Research Scholar, NIT Mizoramin a thlir lawkna hun a hmang. 

October 9, 2012-a tihchhuah tawh, ‘Nghet taka ding zelin (revised & enlarged)’-ah hian bung 30 a awmin a ziaktu chanchin leh IAS exam zinkawng, sorkar hna a thawh chhunga thil thleng hrang hrang, MLA candidate a nih thlengin a tar lang.

Hei bakah hian Manzuala hian mi hrang hrang a tawnte nena an thil tih ho dan te, chutiang mi a hmuh dante tlang takin a ziak a. Mizoram politics chanchin thui tak chhuina a awm bawk. 

Lehkhabu tlangzarh inkhawm hi hun hniha then niin hun hnihnaah C. Lalnundika, Research Scholar, Mizoram University (MZU) kaihhruaina hnuaiah ram leh hnam thil sawihona hun hman a ni a. Lalsawta, Ex-Minister; Lalbiakzama, MPS (retd); Er Ruata Sailo, Lalrinmawii Fanai leh sawm bik dangte an tel a ni.