Japan khawpui, Tokyo-a infiamna inkhawmpui lian, Olympic Games khelh meka intihsiakna ngaihven hlawh bera chhal ngam, 100 metres intlansiaka champion thar ni ta, Italian tlangval, Lamont Marcell Jacobs Jr. kha September 26, 1994-a piang a ni.

Italian track & field sprinter hi thui zawnga inzuan siak thin (long jumper) a ni bawk a. 100 metres Olympic champion thar a nih bakah 60 metres European champion a ni mek bawk.

Hei mai a ni lo va, 100 metres European record leh 60 metres Italian record chelhtu a ni a. Tun tuma Olympic-a a champion kha Italian tlanchak zinga men’s 100 metres Olympic final thleng hmasa ber a ni a, chak hmasa ber a ni bawk.

Tun tum games-ah hian 4×100m relay-ah an team chu a champion-pui bawk.

Jacobs hian 2020–21 indoor season-ah khan 60 metres-ah World Leader niin a khar nghe nghe.

Italian tlanchak, Jacobs hi Mizote tan chuan fahrah tih tur ang chi a ni ve a. A nu zawk hi Italian a ni a, a pa chu American a ni a, sipai a ni thin.

A nu, Viviana Masini leh a pa, Lamont Marcell Jacobs Sr. hi a pa United States Army-a a tan lai, Caserma Ederle, Vicenza, Italy-a a thawh laiin an intawng a. Hetih lai hian a pa hi kum 18 chauh niin a nu hi kum 16 chauh a la ni bawk.

An inneih hnuah Fort Bliss, El Paso, Texas, US lamah an awm zui a. Kum thum hnuah Jacobs hi a piang a, chawlhkar thum chauhva upa a nih laiin a pa hi South Korea-ah sawn a ni a, Jacobs hi Desenzano del Garda, Lombardy, Italy-ah a nu chuan a kalpui thung a, thla ruk a nihin a nu leh pa hi an inthen zui a. A nu hian pa tel lovin a pawm zui ta a ni.

A naupan lai chuan basketball a khel ve thin a. Italian naupang tih takah, football pawh a ngaina hle a, football coach Adriano Bertazzi chuan a tlan chakna chu lo hmu fuhin intlansiak lamah kal turin a rawn ta a ni.

An coach thu ang hian Jacobs hian athletics lam hawiin kum 10 a nih chuan intlansiakna tawi (sprinting) lam a beitan a, kum 2011 atang khan long jump lam nen a kawp zui ta a ni.

Jacobs hi Rome-ah a kawppui, Nicole Daza nen chengin fa pahnih an nei tawh a. A bialnu hmasa lakah fa a nei bawk a, hetih lai hian kum 19 a ni.

Italy leh US khua leh tui a nei kawp thin a, a nu Italian a nih vang leh a pa American niin US-a a pian bawk vang a ni a. Mahse, kum 2010 khan American a nihna hlipin Italian chauh a ni tawh.