Aizawl; Tun March thla kal mek ni 15 chhung hian Mizoram a chetsualna hrang hrang thlengah nunna chan mi 13 (mipa 12 leh hmeichhia 1) an awm tawh a, lirthei chetsualna chu thihna thlen tamna ber a ni.

ZALEN in a chhinchhiah chin ah, March 3, 2022 zing khan Zokhawthar kawnga Mualkawi bulah NH-6 kawng laih hnathawk mektu Shri Balaji Construction company motor (truck) leh bike an insu a, bike a chuang mipa pahnih te chu chetsualna hmunah an thi. 

March 5, inrinni tlai dar 3:30 vel khan Serchhip leh Keitum inkarah tuialhthei phur (tanker) chesualin, kawng thlangah a lum a, tanker a chuang mi 4 zinga pahnih (hnamdang) mipa ve ve thiin, mithite tan Keitum Branch YMA chuan kuang an siam sak.

March 6, Pathianni tlai khan Mizoram chhung hmun pahniha lirtheia chetsualna thlengah mi pathum an thi a, midang pahnih an hliam bawk.

March 13, Pathianni zing dar 3 vel khan East Phaileng leh Suangpuilawn inkara Rungdil ram, Saitual district a thlam kangah mi pathum, mipa kum 51 mi leh 58 mi bakah hmeichhia kum 13 mite chu an kang hlum.

March 13, inrinni vek khan Teirei lui, Bawngva kai thlang leh Khawzasiaka Li, Tlawng, Hortoki ah tui tla hlum mipa pahnih an awm a, March 14, Thawhtanni tlai khan Hriphaw khaw bul, Beraw lui ah mipa kum 21 mi chu a tla hlum bawk.