ZALEN, Apr. 28, 2025: ‘Laldanga Zai’ hitmaker Marina Vanhriatpuii Varte pawhin hnam zai (folk-song) thar a rawn tichhuak leh ta.

Marina Varte music video thar hi — A Nam Rem Rem — tih a ni. A hla thu atang hian mak tih pawh a hlawh mai thei. Mahse, mak ti suh! He hlaah hian Marina-i thiam zawng tak mai, hnam zai lam a ni a. Nikuma folk-song huanga Lelte Award a dawn theihna hla — Aitenawn Pâr — a tihchhuah hnua a release leh hmasak ber a ni. 

A Nam Rem Rem — hla hi Hmingtea Tochhawng phuah a ni a. A music leh recording pawh a hla phuahtu buaipui mek a ni mai lo va, a studio ‘Tan Tlang Records’-a khung vek a la ni cheu a. A hla kalhmangah chuan, a hnara a ‘di’ rim chambang avanga mi pakhat suangtuahna leh ngaihtuahna khawvela a len vel dan a nih hmel.

A music video hi RDS Shots kutchhuak a ni a. April 7 atang khan shooting an nei tan hnuah, April 15 khan an zo a. Zirtawpni zanah Zonet-ah tihchhuah a nih hnuah, Inrinni zan khan Marina-i hiana mi mal YouTube channel — Marina Vanhriatpuii Varte Official — ah a dah chhuak a ni.

A hla avang hian a music video turah pawh hian mihring hi a mamawh tam viau a, mi 35 vel an inlan a. Lâm thiam, mipa leh hmeichhia pahnih ve ve, Art & Culture atanga inzir chhuakte pawh an inlan a. Hlawhtling taka a music video thar tihchhuah theihna tura amah puitu zawng zawngte, sum leh pai, tha leh zung senga a music video-a inlan leh ei tur tumsaktu zawng zawngte chungah lawmthu a sawi. 

A hla chungchangah Marina-i chuan, “A hla hi folk-song chhuak thar a nih avangin kan tang a, a video pawh mawi thei tur ang berin kan buaipui a, tun tum chu kan buaipui rei ve khawp mai. Art & Culture lam hotute pawhin an ngaithla tawh a, mawi an ti angreng hle,” tiin Zalen Thalai Khawvel a hrilh.

Hnam zai chungchang sawiin Marina-i chuan, “Hnam zai champion-pui ve ka duh. Ka tui a, ka tui avanga ti pawh ka ni. Mi nazawng hian an sa duh lo hian ka hria. Keimah bik hi chuan, hnam zai bik hi kalsan ka tum tawh lo. Kum khatah pahnih tal tihchhuah kan tum a; mahse, music video buaipui hi a hautak ve em avangin kan tlin ang em ka hre lo le,” a ti bawk.

Music piah lamah, Marina hian tunah hian sumdawn lam buaipui tan turin, Mission veng lamah thawmhnaw dawr siam tumin a insingsa mek a, a dawrah hian hmeichhe puan bih chi hrang hrangte zawrh a tum a ni.