Kum 2019 June thla daih tawha a tihchhuah tawh, ‘Astronaut in the Ocean’ tih rawn hlawhtlinpui thar leh mektu, Masked Wolf tia hriat lar, Harry Michael hi Greek-Australian rapper a ni a, Australia-a Sydney khawpui, New South Wales lam chhuak a ni.

Kum hnih vel liam tawha a hla tihchhuah daih tawh, ‘Astronaut in the Ocean’ hi kuminah hian khawthlang lam ramah a lar thar leh hluai a, ‘sleeper hit’ tiin an sawisak a, Billboard Hot 100 chart-ah pawh No. 6 a kai hial.

Amah hi kum 1992-a piang a ni a, kum 2019-a an kawm tum khan, “Ka naupan lai a\ang tawhin rimawi hi ka tui em em tawh a, ka inawmtleina ber pawh rimawi tumna hmanrua - piano, keyboard, tingtang leh drums te an ni,” tiin a sawi a. American hip hop ngainatu a nih thu leh kum 13 mi lek a nih lai atang tawhin hla a phuah tan tawh tih a sawi bawk.

Michael-a hian Teamwrk Records nen contract ziakin December, 2018 khan a single hmasa ber, ‘Speed Racer’ a tichhuak zui a. Kum 2021 thleng hian hla leh album a tihchhuah zawng zawng hi he label atanga a tihchhuah vek a ni a, ‘Astronaut in the Ocean’ hi khawthlang lama a lar leh hluai hnuah hian a tichhuak nawn leh a, hei erawh label dang atanga a tihchhuah a ni tawh thung.

January 28, 2021 khan Michael-a hi United States lama inbengbel label, Elektra Records nen contract an ziak a, he balbel hi Warner Music Group ta a ni a, an contract ziah pawh a tlem vak lo.

Elektra hian Michael-a rimawi leh hlate chu Australia leh New Zealand tih lohvah an tihchhuahsak leh vek a, heng ram hnih erawh Teamwrk Records nena an thawhhona hmun a la nih reng avangin an ti tel ve lo thung.

Michael chuan, “Elektra chhungkuaa ka tel ve thei hi ka lawm tak zet a, khawvelin ka rimawi leh ka hlate ngaihthlak theihna tur hun remchang min hawnsak hi ka phurin nuam ka ti tak zet a. Zaithiam thang lai mek ka nih piah lamah, hla tin hi an ngaihvenin an buaipui nasa em em a, hei hi ka zawm duh chhan pawh a ni,” a ti.

June 4, 2021 khan Michael-a hian a single thar, ‘Gravity Glidin’ a tichhuak a. ‘Gravity Glidin’ hi a tihchhuah hnu chawlhkarah NZ Hot Singles Chart-ah No. 40 a kai zui nghal a ni.