ZALEN April 15, 2025 : Lunglei Municipal Council (LMC) Chief Executive Officer (CEO) Donny Lalruatsanga chuan vawiin khan Lunglei Tui Zuar Association hruaitute a kawm a, tui rate chungchang an sawiho. Mat luia tui chawi leh chawi loh chungchang chu rate siamtu pakhat a nih dan sawi a ni.

Lunglei Tui Zuar Association hruaitute chuan tui harsatna karah an duh khawp tui chawi tur an hmuh loh thu leh tui chawi tam zawk chu an pawla inpe lem lo an nih avanga inven vek a harsat thu an sawi a, an member-ah tui thianghlim chauh phur tura thu an chhuah thu leh an infuih ve fo thu LMC CEO hi an hrilh.

Tui zuartute chuan, Tui chawi man (rate) chungchangah tui an pek turte nena inremsiam vek hnuah chauh a man an san thin an ti a, an chawi hlat dan azirin an rate a san thin thu an sawi a. Mat tui chawi lem lote'n hralh to an duh luatah Mat lui tui anga sawi an awm thin chu pawi an tih thu CEO hi an hrilh a, mipuite pawh fimkhur turin an chah a ni.

LMC CEO Donny Lalruatsanga chuan Lungleia tui phura ei zawngte chu sumdawng satliah an ni lo tih leh mipui rawngbawl an ni tih inhre reng a, tui thianghlim ei tlak ngei chauh ei atan phur a, hralh thin tura ngenin, mipuiin tui an mamawhna a san avang leh tui a van avanga tui man tisang lo tur leh mipui dinhmun ngaihtuah chunga sumdawnna kalpui turin a ngen a ni.