Kan hriat theuh angin Mizoram Sawrkar chuan sum leh paiah harsatna a tawk mek ni-a sawi a ni a. Hemi avang hian Zoram mipui a lian a te, lehkha thiam leh thiam vak lo te, thil thlir zau deuh leh hre thui lem lote thlengin kan ram kal zel dan tur thlirin kan fan kual vel ruai a ni ber a. Sawrkar laipui thupek anga CSS sum Department kuta pek chhuah a nih atangin kar khat vel zet a ni ta a, chumi awmzia chu hnathawh tur nei loin Treasury te kar khat chhung an awm tawh tihna a ni. 

He harsatna atang hian engtianga talchhuah tur nge ni a, khawi lam kawng nge zawh tur tih chu keini ang tan chuan hriat phak a ni hauh lo a, kan hriat loh lamah sawrkar-in chak takin hma a la ngei ang tih erawh ka ral hriat ve ruai ruai thung. Kan hriat angin kar khat zet mipuite chiai takin kan awm tawh laia sawrkar lam hotute an la ngawi tlat hi a lunglenthlak thlak angreng hle a, mipui tan thlamuanna thu chak chhuah tur an nei rih lo a nih pawhin kan chiaina chhawk zangkhai tura thu leh hla an neih a hun tawh takzet a ni. 

Hna sem leh induhsakna dang danga kan chet ran thin ang aiin, hun harsa a lo thlena mipui thlamuan kawnga kan che chhuak har deuh thin ni-a lang hi ka ngaihdanah chuan MNF kaihhruai Mizoram sawrkar tihfuh tawk loh phakah ka ngai. Covid 19 hri len tirh lam khan Mizoram mipuite hi pa nei lo ang maiin kan ram hruaitu lu berin min lo ngawihsan veng veng tawh a. Kum upa lam a nih ve tawh avangin hri kai palh hlauhthawn thilah a tawmim deuh a niang tia ngaihtuahna kan sen mek laiin, Airport lamah erawh vung a lo chhuah tha hle niin a lang a. Tuna sum leh paia harsatna thleng mekah pawh hian Mizoram sum bawmpui enkawltu leh hruaitu lu ber a nih angin kan dinhmun siamtha tura sawrkar hmalakna emaw, kan thlen chin emaw tal hi chu puangzar se a duhawm hle a, chu chu mipuite pawhin hriat kan phu hle a ni. Hun ralmuanga rorel aiin, hun harsa a thlen laia mipui thlamuan theitu nih hi a hlu zawk a, hun harsa a thlena mawhphurhna la ngam sawrkar hotu neih phei chu hlu tak a ni. 

Nge, kan Sawrkar hian kan harsatna tawh mek sukiang turin hma a la thei lo a, mipui hriata puan tur a nei lo zawk em ni dawn le!?