Hetia hmasâwnna leh thiamna sâng zelina ‘awlsamna khawvêl’ min chuankaipui tawh hnua thil engkim mai an danglam zawh tâk hnu hian danglam ve ngai lo a awm. Heng hmangaihna te, inngainatna te, induhna leh inthlâkhlelhna te, inngaih veng vengna te hi, heng thiamna leh sànnate hian zu thlâk danglam ve thei ngai lo a! Chu chu ka nei—ka thil neih zînga ka hlut leh roh tak mai chu.

John Green-a’n ‘The Fault in Our Stars’-a Hazel Grace Lancaster a sawitîr tawngkam pakhat kha, amah ka hriat chhuah châng hian ka hre chhuak leh thin… Bial (zero) leh 1 inkâr zau turzia chungchâng kha.

Ka ngaihtuah zui ve vak vak zêl a. Tin, vâna arsi awm zât te, milky way leh galaxy zau tûrzia te khi aw! Chu aia zau zawk… ai pawha la zau lehzual zâwk chu Pathian hian mihring rilruah hian, suangtuahna ropui rapthlâk lutuk a dah a. Chuta a changtunu chu amah, ka thiannû Mawii hi a ni tih tê mai hi ka thuhmâ a nih teh duah chu!

Hmân kum khan hmeichhe pakhat, Mawii ka tawng a. Ka ngaihzâwng e, ka tihna pawh a ni lo; hmêltha ka ti êm êm a, ka tihna phei chu a ni lo lehzual … mai thei! Mahse, hmeichhe ngainatawm tâwpkhawk a ni, erawh ka ti a ni. English hla phuah thiam, Thomas Campion-a (1567–1620) poem pakhat, ‘Cherry-ripe’ pawh kha amah ka hmuh châng hian ka hre chhuak fo : ‘Threre is a garden in her face, / Where roses and white lilies blow; / A heavenly paradise is that place, / Wherein all pleasant fruits do flow’ tia a lo chham kha Mawii hi a phuah chhan chiang!

Mawii chu ka mi hriatchian hmeichhia, chhe si lo a ni. Amaherawchu, amah chuan min hre ve lo. Ka hming te chu a hre tawh mahna; ka hre lo le! Ka lo ràl rinlâwk ang chiahin a takah pawh a ngainatawmin a nêlawm a, a fing a, a thluak a tha hlê. A bulah ka awm a, min nuih si lo hian zu han nui reng peih à! Chu chu Mawii mâwina pakhat chu a ni rêng a. A taimâkna zâwng tak chu ‘nuih’ ni tlat pek chuan! Keimah ang thoin a tawng duh a, fiamthu a duh; keimah ang lo takin fiam a dâwl zêk thung!

Kan han inkâwm tâ a. Ka lei hi a ai-khirh tlat pek! Ka ã a, ka tãlbuai zo—amah Mâwii màwi êm vâng chuan! Mâwii ka tih chu mâwi tak a ni; a duhawmna chu ka duh êm êm a. Mahse, ka ngaizâwng lo—tlat maiin! Branded thawmhnaw a hâk vânga mawi a ni lo; chûng thuam tel lo pawh chuan a hlim tho. Mawii màwina dang leh chu, a lungngaih ber lai pawha mi dang a tinui reng thei hi a ni. A màwizia mai chu maw… vâ’ mite khi a thlalâk thawn ta ila, angel tam tak chu zakin an kimki nghal chawih chawih ang a, hmai an hup nghal chawn chawn ang! Amah en loa hmun dang han hawisan zawk chhûng pawh hi, hun khawhralna, hun uiawm tak a tling!

Chû ka duh êm êm nû chuan pasal a nei tawh; tin, fâ pawh. Mahse, an inthen tlat; pawi ka ti êm êm! Mahse, pawi ka ti leh lo; achhan zawng zawng sawi vek erawh a rem chiah lo! Hmãna nula fel tak ni thin, tûna nuthlawi Mawii chu la upa êm êm lo, la thalai vah mai a ni. Keimah anga mi active har mai chi hi a ni a. A polite-in aia ûte a zah thiam a, tupawh mai hi an nihna angin a kâwm thiam a, a lârpui ber, a zài thiamna ai mahin a thenrual kawm thiamna hi amah ka ngaihsànna a ni tlat.

Mizo mipate hian ‘hmeltha’ ringawt hi kan buaipui a; Mawii anga mâwi hi i buaipui tawh zawk te’ng u! Mawii chu a hmêl leh a make-up vânga mawi ti ka ni lo; a thinlung chhungrila awm, mi dangte hriatthiamna thinlung, zau taka inhawng hiai mai a neih vâng te, tláwm taka a awm ngamna te, a nihna ang ni ngam khawpa a huaisenna te hi an ni zâwk. Chhûngril lama mawi na nâ nâ chu, hmêlah a lo lang chhuak nge nge thin si a. Tling famkim erawh chu tumah kan awm hauh lo mai. Mawii felna pawn chintâwk a nei ngei ang a; fel lohna tam tak a nei ngei ang le. Mahse, tlin lohna lai kan inhriatthiam tawnnate hi Nunkhaw Hlimna thlentu a ni si a.

Zirtirtu ropui ber Lal Isua Krista pawh khan mi famkim lo hlîr asin a zirtîr atân a thlan ni. Matthaia Bung 1 kha chhiar teh—Isua thlahtute pawh kha. Mi nikhua lo vek asin an nih! Corruptor Matthaia khan a record vek kha. Tunge ‘Ka tling e, ka tha famkim e,’ inti tûr awm chuang le!

Fel lo leh tling loa din kan ni a, chu chu inhmuh hmaih luihsak thin ila, kan tlin leh kan felna zâwk hi i infaksak thin ang u—a der pawn ni raw' sek sek… Chuti chuan kan khawvêl hi a lo nuam sawt ang a, ‘Vânram Tlafual’-ah kan chêngho ni mai tûr an! American novelist, Amy Bloom chuan, “Mi famkim lo i ni. Mathei loin dik lohna chuan nghet takin a phuar bet che. Chûng chu i màwina a ni ka ti,” tih tawngkam a’n chhâk chhuak thiamte hi a va’n awhawm tak! Ka ziah ni ngei zâwk se âw … hi ka tia nia!

Ka thiannu Mawii chu, a fel êm êm a, a fel êm avângin a mawi a ni. Chû Mawii màwina chuan nun kawng dik leh fel zâwk min zawhtîr leh thîn. Thiannu, mawi zêl la, ka thiannu ni reng ang che aw!