Aizwl: North Eastern Indira Gandhi Regional Institute of Health and Medical Sciences (NEIGRIHMS) bul, Mawkasiang-a Mizoram sawrkarin ram a lei-ah In sak thuai a nih tur thu dawn a ni a, a tira an ruahman ang Mizoram House tur erawh chuan an sak theih hmel rih lo a, NEC sum a remchan rih loh avangin NEDP sum hmangin thlen lailawk theihna tur In khawr pum tum a ni.
Mizoram sawrkar hian 2014 khan ram acre 2-a zau hi cheng nuai 180 sengin a lei a, dan ang chuan kum nga chhunga he hmunah hian kut thlak a nih loh chuan sawrkar hian a chan thei a ni. Helai hmunah hian ruahman angin thil kal chiah lo mah se, a ram chin hi hung vek tawh a ni a. In hi sak tumin hma lak mek a nih thu, Shillong Mizoram House Assistant Resident Commissioner Joseph Lalchhuanawma chuan a sawi.
Mawkasiang huam chhunga Mizoram sawrkarin damlo te tana riahna tur hi sak tumin hma a la tawh thin a, an sum mamawh hi a thahnem avangin Ministry of Development of North Eastern Region (DONER) ah dilna an siam a, mahse, a tlang tak loh avangin North Eastern Council (NEC) lamah hian Detailed Project Report (DPR) chu thehlut leh a ni. NEC hian cheng nuai 200 chu an sanction a, DPR theh luh leh an hmalak tum dan a inmil theih loh avangin sum hi hren sak (detained) leh rih niin, ZALEN thudawnna chuan a sawi a.
PWD leh GAD te he thil chungchanga an inhlan tawn dan hi GAD chu thu hnuhnung hre ber tur niin thudawnna chuan a sawi bawk.
Hemi chung changah hian Shillong Mizoram House ARC Joseph-a chuan ZALEN zawhna chhangin, sanction a awm hman thu leh detained a nih hnu pawhin hmalak mek a nih thu a sawi a. He In sak tum a nih dan leh an sum hmuh theih te a inmil loh avangin PWD lam chu DPR lo buaipui tha leh tura tih an nih thu a sawi bawka, hmalakna pawh a kal mek ti sawi langin, an thlen chin erawh a hriat rih loh thu a sawi.
Tunah hian sum hmuh la awm lo mah se, Congress sorkar lai khan NEDP sum atangin he hmuna In sa tur hian sum eng emaw zat pek an nih thu pawh a sawi a, a hmun hma lamah dan anga chan theih a nih avangin hall ang chi a sak rih mai tura hmalak mek niin, sum dinhmun avangin a tira an tum dan nen chuan a dang hle dawn niin a sawi.
He hmuna kuthlak thuai a nih loh a, ram hloh theih ni a sawi chunchangah ARC Joseph-a chuan, “Dan ang chuan chan theih chu a ni a; mahse, Mizoramah pawh enkawl lova ram awm chu chhuhsak theih tih a nih laiin enkawl a nih lem loh pawn kan inchhuh chuang lo a, chubakah a hungna te siamin tih fai reng a ni a, chutianga hlauhthawnawm erawh chu a ni hran lo,” a ti a, hmalak thuai erawh tha a tih thu ZALEN a hrilh.