ZALEN, June 02, 2026: Mana Motors chuan May, 2026 chhungin lirthei an hralh chhuah 281 chuang Vahan-ah an ziak lut a, Mizorama lirthei ke li nei zuar zingah thla kal ta chhungin an sang ber.

Mahindra full range dealer an nih atangin Mana Motors-in kum 12 leh thla riat an hman zawh rualin rahbi pawimawh tak an tuk a; India sorkarin lirthei hralh zat a chhinchhiahna, Vahan-ah May chhungin 281 an ziak lut a ni.

India leh Mizoramah Maruti Suzuki-in hma an hruai char char thin a; kuminah Mahindra nen inel tawk chho hle chungin January atanga April thlengin Maruti Suzuki dealer GIG Motors an sang vek a. May-ah erawh 255 ziak lutin 26-in Mana Motors an pha ta lo a ni.

Mana Motors hian Mahindra passenger car - Bolero, Thar, Scorpio, XUV 3XO, XUV 7XO bakah sumdawn nana hman chi (commercial) lirthei laihawl an zuar tel a; GIG Motors-in showroom pahnih, Arena leh Nexa an neih bakah sumdawn nana hman chi an zuar tel bawk.

Mana Motors-in mi mal hman chi car chi hrang hrang an hralh chhuah man chawhrualin nuai 10 chuang daih a ni a, sumdawn nana hman chi an hralh chhuah chawhrualin nuai 10 deuhthaw a ni bawk a. Hetih lai hian kuminah thla nga chhungin vawi thum Vahan-ah lirthei ke li nei 200 chuang an ziak lut tawh a ni.

Lirthei ke hnih nei hralh tam lama Mizorama fal taka hmahruaitu ni ngar ngar, LBS Suzuki-in May, 2026 chhungin 1,088 an ziak lut a, anmahni hnaih ber, KC TVS aiin 697-in an hralh tam zawk.

Suzuki two wheeler dealer LBS Group hian March khan 1,042 ziak lut tawhin kuminah thla nga hman zawh a ni tawh a, tum hnih 1,000 chuang an hralh chhuak tawh bawk.

April, 2025 khan LBS Suzuki-in Vahan-ah 1,112 an ziah lut a, kum khat hnuah thla liam ta kha thla khat chhunga an hralh chhuah hnem leh ber a ni.

KC TVS-in May-ah 391 hralhin kumina an hralh tlem ber dawttu a ni a, January kha TVS two wheeler dealer an nih hnua Vahan registration atanga enin thla khat chhunga an hralh tam ber a ni ve thung a, 535 an ziak lut.