Aizawl: Mizoram chuan thla kalta May aiin June thla ah Covid-19 a tuar nasa zawk dawn niin a lang a, June thla chhung hian Covid-19 vanga thi hi nitin an awm ziah a ni.  

ZALEN chhinchhiahna atanga a lan danin May ni 1-11,2021 inkar chhung khan Mizoramah Covid-19 hri kai mi 1901 hmuhchhuah a ni a, June 1-11,2021 inkar chhung hian hrikai mi 2538 hmuh a ni leh a, thla kalta aia tun thla chhunga hri kai hmuh tam zawkna zat hi 637 a tling a ni. Chhinchhiahna atanga a lan danin May thla kha Mizoramah Covid-19 vanga thi tam ber thla a ni a, mi 25 in nunna an chan a, June ni 1-11,2021 inkar chhung hian Mizoramah Covid-19 vanga thi mi 22 an awm tawh a ni. Tun ang zela a kal chuan June thla hi Mizoram in Covid-19 a tawrh nasat ber thla tur niin a lang a, hri kai leh thi pawh an tam hle dawn niin a lang. 

Chhinchhiahna atanga a lan danin June ni 1 ah hri kai hmuh 235 awmin thi 4 an awm a, ni 2 ah hri kai 228 awmin thi 1, ni 3 ah hri kai 205 awmin thi 1 a awm, ni 4 ah hri kai 236 awmin thi 5 an awm a. June ni 5 ah hri kai 267 awmin thi 2, ni 6 ah hri kai 113 awmin thi 1 an awm leh a, ni 7 ah hri kai 317 awmin thi 1 an awm, ni 8 ah hri kai 203 awmin thi 2 an ni a, ni 9 ah hri kai 346 awmin thi 1, ni 10 ah hri kai mi 210 awmin thi 3 leh June ni 11 ah hri kai 178 awmin thi 1 an awm bawk a ni.