May thlaah hri kai 6268, mi 25 thi

Admin - Jun 06, 2021

May, 2021 chhung ringawta hri kai hi 47.12% an tling a ni

Aizawl: Mizorama hripui Covid-19 a len hnuah May 2021 kha Mizoramin a tawrh nasat ber thla a ni a. May thla chhung hian hri kai mi 6,268 an awm a, thi mi 25 an awm bawk. Thi tawh zat hi mi 52 an tling tawh.

ZALEN chhinchhiahna atanga a lan danin nimin zing thleng khan Mizoramah Covid-19 positive mi 13,300 an awm tawh a, heng zinga 6,268 hi May thla chhunga hmuh chhuahte an ni a. Hri kai pum pui atanga chhutin May, 2021 chhung ringawta hri kai hi 47.12% an tling a ni. May thla chhung hian ni tin hrikai hmuh chhuah hi a tam hle a, May 25, 2021 kha ni khat thil thua hrikai hmuh chhuah tam ber ni niin hemi ni hian positive mi 317 hmuh chhuah a ni.

Nimin tlai thleng khan Covid-19 vanga thi hi 52 an awm tawh a, an zinga 25 hi May, 2021 thla thi an ni a. Mitthi 48% hi May thlaa thi an ni. Covid-19 vanga thi te hi natna benvawn zun thlum, TB leh a dang neite an ni deuh vek nia thudawn a ni. June thla chhungin Covid-19 vanga thi mi 12 an awm a, Covid-19 vanga Mizorama thi hmasa ber chu Lalsangkhuma (66) Dawrpui niin ni 28.10. 2020 khan a boral a ni.

Share now