Mizorama badminton inelna ngaihlut hlawh ber leh lian ber, NEXA GIG MOTORS MBA Official Championship 2024 (Junior & Senior) khelh turah hmeichhe lawmman tihpun a ni dawn.

Mizo shuttler-ten MBA hnuaia inelnaa champion nih an châk berna tournament hi Thawhlehni atang hian Ramhlun Indoor Stadium-ah khelh tan a ni a. Hmeichhe huang bikah kuminah hian kum dang aiin lawmman pawisa fai a tam zawk dawn.

Mizoram sorkar hnuaia Women & Child Development,, TATA Trusts (NEIDA) leh MBA thawhhona hnuaiah inelnaa hmeichhe tel an pun theih nana hma laknaah lawmman pawisa fai a pun dawn bakah grassroot centre ti thate tan lawmman siam a ni dawn.

Thawhhona hi Mission Shakti hnuaia Beti Bachao Beti Padhao (BBBP) programme hnuaiah neih a ni a, WCD hian hemi atan hian Rs 1,00,000 tumin TATA Trusts-in Rs 55,000 an thawh bawk. 

TATA Trusts hian ‘Girl Child Promotion’ hnuaiah programme chi hrang hrang siamin thawhhona pawh hi hemi hnuaia kalpui hi a ni a. MBA-in pawisa a dawnte hi grassroot centre tha, hmeichhe tana coaching kalpui tha leh chet thatpuite lawmman atan leh championship-a hmeichhe che thate lawmman tihpun nan hman a ni dawn a ni. 

MBA Official Championpionship khelh tur hi junior leh senior huanga khelh tur a ni a. Junior hi June 25-29, 2024 chhunga khelh tur niin July 2-6, 2024 chhungin senior khelh a ni ang.

Championship hi Badminton Association of India (BAI) calendar-a lang phak tournament niin NEXA GIG Motors-in a sponsor a, co-sponsor eng emaw zah dang an awm bawk a. Inkhelte hi MBA YouTube channel-ah live-a pek thin a ni ang.