Aizawl: Mizoram Board of School Education (MBSE) chuan April ni 22-24,2020 inkar chhunga HSSLC Exam neih chhunzawm an tum chu thu leh awm hma atan an thulh leh.

Thuchhuah an siamah MBSE chuan COVID-19 laka Mizoram kan him khata hriat a nih avangin, zirlai exam la zo lo laklawh tak tak te hmakhua ngai in MBSE chuan April ni 22- 24 chhung hian exam nei turin a ruahman leh a. Amaherawhchu, "India ram pum huapa he COVID-19 laka invenna kal zel avang hian exam hi neih rih loh zawk a tha ang e", ti a Central sorkarin Mizoram sorkar hnena a rawn ngenna chu MBSE chuan zahawm a ti hle a. Dt. 17th April, 2020 dar 7:30 P.M. a MBSE Office a emergency meeting chuan HSSLC Exam laklawhte exam zawhtir hram tuma hmalakna kal mek chu thu leh awm hma atan a titawp lailawk a ni. Hemi avanga zirlaiten harsatna an lo tawh phah te pawh a awm thei ang tih hre chungin, Central Sorkar atanga ngenna hi ngaih pawimawh a tul si avangin hriatthiamna kan dil nghal a ni, an ti.