March 9, 2024; MBSE chairman JH. Zoremthanga'n class X zawhna chungchanga thil dik tawk lo awm nia lang chu an ngaih thutak thu leh action lak ngei a nih tur thu a sawi.

Mizo Students' Union (MSU), General Headquarters, Aizawl chuan vawiin March ni 9 chawhnu dar 1 khan tunhnaia pawl sawm exam neih zawh taka thu leng vak chungchangah Mizoram Board of School Education (MBSE) Chairman JH Zoremthanga kawmin thil awmzia an sawi pui.

MSU chuan MBSE enkawltute chu pawl sawm exam a question set pattern leh school thenkhata syllabus an in pek te board question nen a in ang diak diak awm te chu zirlaite leh school zirtirtu atangin MBSE rinlohna thlen thei anih thu an thlen a. MSU chuan hetiang thil hi tun hma pawhin ngaih bel theih tura school thenkhat atanga syllabus inpek fuh bik riau a thlen thin tawh thu leh hetiang thil avanga admission thlenga nghawng thei thin a nih thu MBSE Chairman hi an hrilh a. MSU chuan he thil thleng hi Mizoram zirna quality leh Zirlaite moral ti chhe thei a nih avangin uluk taka chhui chiang tur leh inquiry la a, hrem ngai an awm anih pawhin dan anga hrem ngei turin MBSE Chairman hi an phut a, MBSE hmalakna hi MSU chuan an en zuizel tur thu an sawi bawk.

MBSE Chairman JH Zoremthanga chuan a thawhpuite nen MSU hruaitute hi tha taka lo dawng sawngin, board mawhphurhna a nih angin hma lak ngei tum a nih thu MSU hruaitute chu a hrilh a. March ni 11, 2024 Thawhtanni ah thuneitu sang zawk te nen dan anga hmalak anih theih nan inrawn khawmna neih tum a nih thu sawiin, MSU hruaitu te chu lo ngaichang turin a ngen a, he thil thleng hi an ngaih serious thu leh action lak ngei a nih tur thu a sawi bawk.