Aizawl February 7, 2023: Parliament session kal mêkah vawiin khan Mizoram MP K.Vanlalvena chuan Ayush Department hmasawnna tura India sawrkarin Mizoram sawrkar a tanpuina a pek dan chungchang a zawt a, hei hi Union Minister of Ayush Sarbananda Sonowal chuan ziakin a chhang. Medicinal plant hectare 370-a chin enkawl nan nuai 190.77 approved tawh tih a sawi.

Sonowala chuan Aizawl-a Ayush Hospital khum 50 awmna dinna turin First Instalment ah nikum ah nuai 69.609 pek a nih thu leh second instalment atan nuai 100 approved thar leh tawh a ni tih a sawi a. Saitual-a Ayush hospital dinna turin nuai 100 approved a nih tawh thu Minister hian a sawi bawk.

Union Minister of Ayush hian Kum 2015 atanga 2021 chhungin Mizoram chhung hectare 373-a zauah Ramhmul damdawi (medicinal plant) chinna hmun siam a ni tawh tih a sawi a, Ramhmul damdawi chinna hmun venhimna leh humhalh kawnga hmalakna atan Mizoram Forest Deptt te project siam nuai 190.77 chu Central sawrkarin a approved sak thu leh First Instalment atan nuai 76.30 Mizoram sawrkar hnenah pek a nih tawh thu Minister hian a sawi bawk a ni.