Aizawl May 10, 2023 : LESDE Department buatsaih Mizoram Mega Job Fair (National and International) 2023, Millenium Centre chunga neih chu vawiin khan khar a ni. Fair-ah hian register mi 2110 chuang an awm a, hna hmu nghal mi 50 chuang an awm a, Employer te hnena in register, interview leh document ensak hmabak engemaw zat an awm bawk.

Labour, Employment, Skill Development & Entrepreneurship (LESDE) Mega Job Fair-ah hian rampawn leh ramchhhunga company ten heng sector: Financial Institutions, Banking, Healthcare, Service, Automobile, IT, FMCE, Tourism and Hospitality, Beauty & Wellness etc, sawm khawmin mizo thalai hna zawng tan hnathawh tur 1800 chuang an chhawpchhuak a, Fair tlawhtu register mi 2110 chuang an awm a, a hmuna hna hmu nghal mi 50 vel an awm. Employer te hnena in register, interview leh document ensak hmabak hi tlai dar 5 thleng khan mi thahnem tak an la awm bawk a ni.

LESDE department hi Mizoram Sawrkar hnuaia thalaite tha tih chakna (Youth empowerment) lama hmalatu a ni a, thalaite eizawnna tlak thiamna pek (Skill Training) te, Skill Competition, Innovation leh Entrepreneurship Fair leh Competition an buatsaih thin. Mega Job Fair pawh hi thalai eizawnna zawng mek te tana buatsaih a ni. Kumin 2023 chhung hian Mizo thalaite tana hmasawnna tur programme buatsaih tur hmachhawp an nei mek bawk a ni.

Job Fair hi May 9, 2023 khan Tawnluia Deputy CM-in a hawng a, Dy. CM chuan, a vawikhatna atan Job Fair buatsaih a ni chu Mizo thalaite tan thil tangkai tak leh hlawkthlak tak a nih thu a sawi a, Covid vanga kum hnih chhung zet sawrkarin hna a lak mumal theih tawh loh hnuah hetiang a LESDE Dept. in thalaite tan hun remchang a siamsak chu lawmawm a tih thu a sawi.