Message thunna bottle, Canada atanga mel 3,000 zeta thui a kal hnuah Wales chhim lama vaukamah ui pakhatin a hai chhuak.

Brynna-a kum 52 mi, Amanda Tidmarsh-i chu a ui pahnih nen Ogmore-on-Sea kama an len khawthawn laiin a uite hian um pakhat, patekin a bawm luk an hmu a, hetah hian a lo awm a ni.

Hetiang an chhar hi an phur tak zet tih thu a sawi a, a hmain hetiang lam hawi hian an chhungkuaah fiamthu an lo thawh tawh thin a, lui kama a kal apiangin a zawng ru \hin tih a sawi.

A thawntu, chakai man thin hnena chanchin a hrilh chu a chhanna dawn hlan a nghakhlel hle tih a sawi.

Canada hi Wales atanga km 4,800 chuanga hla niin bottle chhunga thu inziakah chuan November, 2020-a tuipuia dah a nih thu a inziak.

Tidmarsh-i chuan Vale of GLamorgan-a vaukamah hian labradoodle Daisy leh Jack Russell Ollie te nen an tei chhuak chu uaiin um fai tak an hmu a, patek leh tuipuia bawlhhlawh eng eng emawin a lo bawm thu a sawi.

“Ka hmuh tirh chuan duhawm takin ka hmu a, tikeh lovin ka hawn a, ka rilru chuan a chhungah chuan eng emaw thil hlu tak a awm ka beisei a ni,” a ti.

A phur hle tih a sawi a, mahnia hawn mai atan chuan uiawm lutuka hriain a fapa chu hawnpui turin a sawm a, a nghak tih a sawi.

“A special hle a, ka fapa leh ka fanu ka hrilh nghal a, anni pawh keimah ang bawkin an lo phur a, an awih phal lo hial a. Ka nu hnenah hian patek zingah rohlu ka zawn \hin thu ka lo sawi tawh thin a, tunah hian ka chhar ta a ni,” a ti.

Um chhunga lehkha lo awmah chuan a paihtu hi snow crab fisherman a ni a, John Graham-a a ni a, a thil paih chu a lo chharin a biakpawh theihna turin a email a dah bawk.

A inziah dan chuan a lawngleng atangin hemi lo pawh hi paih chhuah a lo nei tawh a, County Kerry, Northern Ireland-ah len chhuah a lo ni tawh tih a tar lang.

Tidmarsh-i chuan, “A inchhin phui tha hle a, a chhungah hian zip lock bag-in tihhnan leh niin chumi chhungah chuan lehkha inziak hi a lo awm a ni,” a ti a. Graham-a hnen atanga chhanna dawn hlan a nghahhlelh thu a sawi bawk.

A um hi Rhondda Cynon Taf-a a chennna in bul greenhouse-ah a dah tha nghal bawk.